Larsap in Presbyterian Kohhran puipate a kawm

Mizoram Governor PS. Sreedharan Pillai leh Mizoram Presbyterian Kohhran hruaitute chu nimin chawhma lam khan COVID-19 hrileng dona chungchang sawihoin Aizawl-a Raj Bhavan-ah an in kawm.

He an inkawmna ah hian Mizoram Governor chuan Mizoram chu COVID-19 hrileng dona kawngah State dang te ngaihtuah chuan a thawk tha pawl tak kan ni tih sawiin, hei hi a chhan pawimawh tak pakhat chu Kohhran hruaitute leh NGO hruaitute puitlinna leh an mawhphurhna an hriatchian vang a ni, a ti a. Governor chuan Mizoram-ah chuan Kristian sakhaw betute an tam ber tih pawh sawiin, hei vang hian Covid-19 Hrileng dona kanga mipui te zawm tur pawimawh zirtir kawngah leh sawrkar hmalakna te thlawp tura inzirtirna kawngah Kohhran hruaituten mawhphurhna pawimawh tak an nei tih a sawi a. Hemi chungchang sawiho tur hian kohhran hruaitute inzawmkhawm pawl, MKHC te kawm pawh a la tum tih a sawi a ni. Governor chuan Mizoram-a Kohhran lian ber Presbyterian Kohhran mawhphurhna chu a la pawimawh dawn chauh tih a sawi bawk.

Governor leh Synod Puipate inkawmnaah hian Synod hotute hi Moderator, Rev. Dr. C. Lalhlira chuan a ho a, Synod puipate chuan Hrileng dona kawngah Central sawrkarin State a rawn chhawmdawl thin te leh mi harsa te tan buhfai eitur te a thlawn bakah tlawm taka khul tura ruahmanna a rawn siam thin avangin PM hnenah lawm thu an sawi a. Presbyterian Kohhran leh Kohhran dangte pawhin COVID-19 hrileng dona kawngah sawrkar an thlawp tlat thu an sawi bawk.