Mizoram-a ASF lenna ah Vawk 1,473 a thi tawh

Mizoram-a Vawk natna hri, African Swine Fever (ASF) lenna hmuna Vawk thi chu nimin thleng khan 1,473 a tling tawh.

AH&Vety Department-in an chhianchhiah dan chuan Vawk natna hri, African Swine Fever (ASF) lenna Mizoram-a District pali – Lunglei, Mamit, Aizawl, Serchhip leh Lawngtlai-ah te chuan ASF vangin Vawk 1,473 an thi tawh a, Aizawl, Lunglei, Champhai, Khawzawl, Serchhip leh Lawngtlai District-ah te hian ASF vang ni lo, a chhan hriatloh in Vawk 361 a thi tawh bawk a, heng District-ah te hian Vawk 7,793 a la awm mek a ni.

Hetihlai hian AH & Vety Department chuan nimin khan thuchhuah siamin, ASF vanga Vawk thi te lakhawma an Department-in an phum thin chu an chhunzawm thei tawh lo tih an sawi a. Vawk thi te chu a neitute’n an remchan dan anga an lo phum mai a ngai rih dawn a; Vawk thlanmual tur dang puahchah mekin engemaw hnuah Vawk phum hna an chhunzawm leh theih an beisei tih an sawi a ni. Vawk thi te hi khur thuk taka laiin khur mawng-ah Chinai dah hnuah Vawk ruang dahin Chinai bawka khuh leh tur a ni a, leivunga chhilh a nih hnuah Chinai-a khuh leh tur a ni, an ti bawk.