Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Hri leng laka hmalakna chhunzawm turin chah

Mizoram Governor, PS. Sreedharan Pillai chuan Baptist Church of Mizoram (BCM) hruaitute chu hrileng laka himna tura an hmalakna te chhunzawm zel turin a chah.

Mizoram Governor hian nimin khan Raj Bhavan-ah BCM Kohhran hruaitute hi kawmin an Kohhran mite CO-VID-9 hrileng lakah an lo himna tura an hmalak dan te zawtin, tuna hmalakna tha tak kal mek chu chhunzawm zel turin a chah a. Sawrkar, Kohhran mite leh Tlawmngai pawlte hmalakna avangin Mizoram dinhmun chu India ram hmundang lakah chuan la ziaawm mahse inthlahdah a thiang lo a. Tun hun hi tanlak hun tak leh nasa zawka fimkhurna inzirtirna kalpui hun a ni, a ti.

Mizoram mipuite chu Pathian tih leh mahni inthununna nei tha tak an nih zia he hrileng dona kawnga sawrkar an thawhpuina ah hian a lang chiang em em tih sawiin Governor chuan, hei hi Mizoram himna chhan pawh ni berin a hriat thu a sawi a. “Kan damdawi In te a lian tawk lova, hmanrua te pawh hmundang angin a awm tha tawk lova, a thawktute te pawh an tam tawk lova. Kan himna ber tur chu lo inven lawk leh kan theih ang chin apiangah theihtawpa fimkhur hi a ni a. Hei hi mipui ten kan hriatchian em em a ngai a ni,” a ti bawk.

He hunah hian BCM President kalchhuak Rev. Dr K. Lalrinthanga leh President, V. Laldingliana bakah an Kohhran hruaitu thenkhat te an tel a ni.

Comments

Chhiar Hlawhte