Latest News

Bye-election neih tur pualin Thenzawl-ah MPF in Joint Platform an buatsaih

Serchhip Bial-a Assembly bye-election neih tura inbuatsaihna kal zelah Inrinni khan Mizoram Peoples Forum (MPF) Thenzawl Joint Local Forum buatsaihin ‘MPF Joint Platform’ neih a ni.

Thenzawl Joint YMA Hall-a MPF Joint Platform hi an President, Rev. R. Lalremruata chuan kaihruaiin he hunah hian Serchhip bial Assembly bye-election neih tura Candidate 6 te zingah panga (5) an tel thei a, heng Candidate te hi thusawina hun minute 20 theuh pek niin thusawi dan tur indawt an pawh hmangin MNF Candidate, Vanlalzawma chuan a sawi hmasa ber a ni. He hunah hian Vanlalzawma chuan Serchhip leh Thenzawl-ah tlawmngai pawl hrang hrang te kawmin khawtlang tana hmalakna tur hrang hrang an lo sawiho tawh thu sawiin, heng bakah hian Thenzawl chu Puantahna hmunpui a nih angin an Puantah chu tih changtlun tul a tih thu leh a Market pawh ngaihtuah ngai a tih thu a sawi a, Zirna lama hmasawnna atan College din tul a tih thu leh Golf Course pawh tih changtlun a tul thu te a sawi a ni.

Hemi hnu hian ZPM Candidate Lalduhoma chuan thu sawi ve lehin Serchhip bial mipuite khawngaihna chauh chhuan tur a neih thu sawiin, MLA Fund hmanga hna chi hrang hrang an lo thawh tawh te bakah chhunzawm tura hmachhawp an neih te a sawi a. Handloom chungchangah MLA atana thlantlin a nih chuan a market kalpui tura Agreement ziahpui tur an awm tawh thu sawiin, Market-ah an buai tawhloh tur thu a sawi a, Lakhuihthei sawngbawlna khawl din tura hmalak a nih tur thu a sawi bawk.

A pathumna a thu sawitu BJP Candidate, Lalhriatrenga chuan Serchhip bial mi a nih thu sawiin, Mizo leh Kristian ni chungin BJP hmangin hmasawnna hna thawh theih a nih thu a sawi a. Ram leh Hnam tana thahnem ngaihna chu Mizo-na a nih thu sawiin, Rinawmna leh Taihmakna chu Kristianna a nih thu a sawi a. He inthlanna a Campaign turin Union DoNER Minister chu a rawn kal dawn thu leh hmalakna tur hrang hrangte pawh a rawn puan dawn thu a sawi bawk.

Hemi hnu hian INC Candidate, PC. Laltlansanga chuan thu sawiin, mirethei leh harsa tak atanga seilian a nih avangin rethei te retheihna hriatpuiin MLA atan thlantlin a nih chuan mirethei te banphak tura MLA Fund chawihniam anih tur thu a sawi a, MLA Fund chauh ni lovin hmasawnna atan sum dang pawh an hailuh theih tur thu a sawi a, tun tuma Candidate te zingah Serchhip bial mamawh hre ber tur leh a umzui chak ber tur a nih thu a sawi bawk.

A tawp bera thu sawitu MPC Candidate, Vanlalruata chuan Mizoram khaw hrang hranga hmasawnna hna thawh theih dan tur an lo zirchian tawh thu sawiin, Assembly bial 40 zingah Serchhip bial chu hmasawnna tura theihna nei tha ber a nih thu sawiin, hei vang hian Serchhip Bial-a MLA nih chu a chak thu a sawi a, thlantlin a nih chuan theihtawp chhuaha hma a lak tur thu a sawi bawk a ni. He hunah hian Party tin aiawh mi 30 theuh telin TV lamah live-a pekchhuah a ni bawk.

Comments

Chhiar Hlawhte