Mizoram-ah hri kai mi 8 hmuh belh leh an ni

Niminpiah-a Mizoram-a Sample enfiah 735 atangin COVID-19 hri kai mi 8 zet hmuhchhuah leh an ni a, Mizoram-ah hri kai hmuhchhuah hi an la pung chho leh mek a ni.

Niminpiah khan ZMC Laboratory-ah Sample 107 enfiah niin COVID-19 hri kai mi pakhat hmuhchhuah a ni a, tunhnaia State pawn atanga rawn haw, taksa-a hri kai lanchhuahna nei a ni. Niminpiah khan District hrang hranga TrueNat Laboratory atangin Sample 28 enfiah niin hri kai pathum hmuh an ni bawk a, Hnahthial-ah tunhnaia hri kai hmuhchhuah nena inkawmhnaihna nei hri kai pakhat hmuh niin Champhai District-a Zokhawthar-ah hmeichhia kum 65 leh 76, taksa-a hri kai lanchhuahna nei te atangin hri kai hmuhchhuah an ni bawk a, hri an kaina hriat a ni lo thung.

Niminpiah khan Mizoram-ah Rapid Antigen Test hmangin Sample 600 enfiah niin heng atang hian hri kai 4 hmuh an ni bawk a, an vai hian Lengpui Airport Screening Point atanga hri kai hmuhchhuah te vek an ni thung.

Hemi hma Nilaini khan Mizoram-ah Sample 803 enfiah niin hri kai mi pathum hmuhchhuah an ni bawk a, heng hri kai hmuhchhuah te hi Hnahthial District-ah mi pakhat leh Lengpui Airport Screening Point-ah Khawzawl leh Serchhip-a haw tur te an ni thung.

Nimin khan Mizoram-a hri kai enkawl dam an awmloh laiin niminpiah khan hri kai mi 2 enkawl dam an awm thung a, heti hian nimin tlai dar 5:00 thleng khan Mizoram-a hri kai hmuhchhuah chu 4484 an tling ta a, hri kai zinga mi 4436 te chu enkawl dam ni tawhin hri kai hmuhchhuah atanga za zela 98.92 te chu enkawl dam an ni tawh a, tunah hian hri kai enkawllai 37 la awmin hri kai zingah nunna chan mi 11 an awm tawh bawk a ni.