Ni khat-ah COVID-19 hri kai 105 hmuhchhuak

Inrinni khan Mizoram-ah Sample 2300 enfiah leh niin heng atang hian hri kai 105 hmuhchhuah leh an ni a, kumin a nikhat-a hri kai hmuh an tam ber tum nia hriat a ni.

Inrinni khan ZMC Laboratory-ah Sample 1007 enfiah niin hri kai mi 48 hmuhchhuah an ni a, an zinga mi 41 te chu hri kai nen inkawmhnaih avanga inkhunghrang lai niin midang 7 te pawh hi inkhunghrang lai mek an ni bawl. Inrinni khan District hrang hranga TrueNat Laboratory-ah Sample 78 enfiah niin hri kai hmuhchhuah an awmlo thung a, Rapid Antigen Test hmanga Sample 1215 enfiah atangin hri kai mi 57 hmuhchhuah an ni bawk. Rapid Antigen Test hmanga hri kai hmuhchhuah zing 29 te hi Lengpui Airport Screening Point atanga hri kai hmuhchhuah an ni a, Aizawl District chhung hmundang ah hri kai 22 hmuh ni bawkin Kolasib District-ah hri kai mi 4 hmuh an ni a, Lawngtlai District-ah hri kai mi 2 hmuh an ni bawk.

Nimin khan Mizoram-a hri kai enkawl mi 8 te chu hri lakah fihlim ve lehin anmahni enkawlna hmun atanga chhuahtir an ni ve leh a, heti hian nimi tlai dar 5:00 thlenga Mizoram-a hri kai hmuhchhuah tawh chu 5388 niin an zinga mi 4671 te chu enkawl dam an ni tawh a, hei hi hri kai hmuhchhuah atangin zaa 86.69 niin tunah hian hri kai enkawllai 704 an la awm mek a, hri kai zingah nunna chan mi 13 an awm tawh bawk a ni.