Bairabi - Sairang Railway Project hnathawh December 2023-ah zawh hman tum a ni

Chief Secretary Lalnunmawia Chuaungo chuan Northeast Frontier Railways (NFR) in Bairabi leh Sairang inkara KM 51.38-a thui Rel kawngin a siam mek chu nimin khan a tlawh a, Bairabi - Sairang Railway Project hi December 2023-ah zawh hman tum niin Sairang Rel Station atang hian Rel 10 vel tal lutchhuak tura beisei a ni.

Bairabi - Sairang Railway Project tlawhtu Chief Secretary, Lalnunmawia Chuaungo hi Bridge No.115, Khamrang-ah Vinod Kumar, CE, Bairabi to Sairang Railway Project, NFR leh a thawhpui ten an lo dawngsawng a, hemi hnu hian Chief Secretary leh NFR Engineer te chuan Mualkhang Rel Station siam mek te, Bridge No.161, 167 leh 196 te tlawh lehin uluk takin Sairang Rel Station buatsaih mek te an endik a. NFR hotuten an harsatna chinfel sak tura state sawrkar hnena an lo thlen tawh chinfel dan turte pawh NFR hotute nen hian sawiho a ni a, tunah hian hna thawh tur zawng zawng atanga chhuta a chanve aia tam thawh zawh tawh a ni a; December 2023-ah he Rel kawng leh Station te hi hman theih tura peihfel hman beisei a nih thu NFR hotute chuan an sawi a ni.

Chief Secretary chuan Mizoram chhungril zawka Rel kawng rawn lut tur chu nghahhlelhawm a tih thu sawiin, hei hian Mizoram State Economy tan nasa takin hmasawnna a thlen dawn a ni, a ti a. Bungraw chi hrang hrang - ei leh in, insakna bungrua leh nitin mamawh thil te pawh tun aia tlawm zawk leh rang zawk daihin a lut thei dawn tih a sawi a. Mizoram-a kuthnathawktute tan pawh Rel rawn lut hian tangkaina nasa tawk a neih tur a sawi a. Kuthnathawktute tharchhuah Phai lama thawnchhuah pawh nasa takin a awlsam zawk dawn tih a sawi a. Rel kawng siam hna thawktute chu an hna uluk taka chhunzawm tur leh contractor te hnathawh pawh veng uluk zel turin a chah a. State sawrkara an mamawh an thlen leh State sawrkarin a chinfel ngai apiang te pawh a theih anga rangin sawrkarin chinfel a tum thu a sawi bawk a ni.

Bairabi leh Sairang inkarah hian Rel Station 4 – Hortoki, Kawnpui, Mualkhang leh Sairang a awm dawn a, NFR hotute sawi danin he Rel Kawng siam hna hi kum 2008 May thla khan National Project zinga pakhat atan puan a ni a. Tunah hian hna lian tham leh hautak zual 74% lai thawh zawh tawh a ni a; Rel Station 4 te siam hna bika pawh hi 55% thawh zawh tawh niin he project pumpui-a hnathawh tur zinga 57.80% thawh zawh tawh a ni.

He Rel kawng KM 51.38 a thui ah hian Lei dawh liantham (Major Bridge) 55, Lei dawh tenau deuh (Minor Bridge) 87 leh leiverh (tunnel) Metre 12,672.25 a thui a awm a. He Rel kawng siam hna hi March 2023-a thawh zawh tura chhut ni mahse hun rei tak chhung Compensation ngiattu ten harsatna an siam avang te, Hri leng avanga Lockdown te leh hnathawktu tur chhawr tur phurhluh chungchangah te harsatna te a awm avangin a hun pangngaiah zawh hman a nih hmel loh a. Thla 10 chuang zet hnathawh a khaihlak avangin kum 2023 December thla ralhmaa zawh hman beisei a ni ta zawk a ni.

Tun dinhmunah Bairabi to Sairang Railway Project siamna atana senso ngai zawng zawng chu cheng vbc. 5521.45 a ni a, heta tanga pawisa hman tawh chu cheng vbc. 3872.91 a ni a. He Rel kawng, darkar khata KM 100 thlenga chaka Rel tlan theihna tur siam hna hi NFR chuan a duh uluk hle a, Contractor hnathawk thalo 18 lai a lo chawlhtir tawh a ni. Sairang Rel Station atang hian a tlem berah Rel 10 tal lutchhuak tura beisei a ni a. Aizawl to Delhi atan Rajdhani Express, Aizawl to Guwahati tan Rel chak chi, zirlai leh damlo te pan tamna lama kal tur Rel te leh a dang te a lut chhuak tura ngaih a ni. Station dang te pawh hi lian pangngai taka duan vek leh a tul anga zauh theih tura ruahman vek a ni.