Latest News

Serchhip-ah COVID-19 invenna tura sawrkar ruahmanna tha taka kalpui dan tur sawiho a ni

Serchhip District Task Force Committee on COVID-19 chu nimin khan an Chairman Serchhip District Bawrhsap, Kumar Abhishek hova thukhawmin COVID-19 invenna tura sawrkar ruahman hrang hrangte tha taka kalpui a nih theih nana thil tul hrang hrangte an rel.

He thutkhawm Serchhip DC Meeting Hall-a neih ah hian Bawrhsap, Kumar Abhishek chuan kumin-a COVID-19 thawh hnihna India ram laili lama miten an tawrh mek dan thlirin he hripui hian nasa zawk leh a hma aia hlauhawm zawkin min tuam thei reng niin a lang a. Chutiang dinhmun thalo tak lak ata kan zaa kan him theih nan, himna dan te tha taka kan zawm a, thuawih taka kan awm theuh a tul hle a ni, a ti a. COVID-19 thawh hnihna hlauhawm tak laka kan him theih nan Serchhip District mipuite thawhpuina a sawm bawk a ni.

Nimin-a District Task Force thukhawm hian sawrkarin SOP a duan sa chak taka umzui dan tur chi hrang hrang a rel a, amaherawh chu nimin vek khan State Level Committee chu Aizawl lamah an thukhawm nia hriat a nih avangin tuna SOP awmsa mila hmalak dan tur an sawi te chu State Level thurel a zira la danglam leh thei a ni thung a. Serchhip khawpui leh Serchhip District chhungah COVID-19 laka himna dan hrang hrang, Social Distancing, Sanitizer, Mask, Dawr leh Pisa, puipunna leh Sport practice hmuna SOP in ti ngei ngei tura a beisei hrang hrangte chu khauh lehzuala kalpui nise an ti bawk.

He thutkhawm ah hian Serchhip District chhunga COVID-19 vaccine pek tawh dan tarlan niin kum 60 chunglam First Dose la mi 2201 awmin an zinga 688 in Second Dose an la tawh a, kum 45 chunglamah mi 1920 in First Dose la tawhin an zinga 46 in Second Dose an la leh tawh bawk a, Frontline Workers zingah mi 2283 in First Dose la tawhin an zinga 1193 ten Second Dose an la tawh bawk. Health Care Workers 714 in First Dose la in an zinga 708 in Second Dose an la tawh bawk a. Tunah hian Second Dose hi pek chhoh mek zel a ni a, nimin pawh khan hmun 5 lai ah Second Dose hi pek a ni.

Nimin-a thutkhawm ah hian Serchhip SP Stephen Lalrinawma leh Addl. DC Lalmuansanga Ralte bakah Thenzawl SDO (Civil) Amol Srivastava leh SDO (Sadar) C. Laltleipuii leh District Task Force Member te an tel a ni.

Comments

Chhiar Hlawhte