Serchhip District-a hri kai hmuhchhuah 200 tling tawh

Serchhip District-a COVID-19 hri kai hmuh-chhuah tawh chu mi 200 an tling ta a, nimin khan hri kai mi 64 zet hmuh belh leh niin heng te hi State pawn atanga rawn lut an ni.

Niminpiah khan Serchhip District-a TrueNat Laboratory-ah Sample 6 enfiah niin hri kai hmuh an awm lova, Rapid Antigen Test hmanga Sample 77 enfiah atangin hri kai pakhat hmuhchhuah a ni thung a, hri kai hmuhchhuah hi Thenzawl-a hmuh-chhuah niin mipa kum 33 mi a ni a, April ni 19, 2021-a Delhi atanga lo haw, In lama inkhunghrang lai mek niin taksa-a hri kai lanchhuahna neilo a ni.

Hei bakah hian tunhnaia West Bengal inthlanpui-a Duty Mizoram Police mi 267 te chu Thenzawl-a PTS rawn thlenpui niin nimin khan Rapid Antigen Test hmangin an sample enfiah sak an ni a, heng atang hian COVID-19 hri kai mi 64 zet hmuh belh leh an ni bawk a, heng hri kai hmuhchhuah te hi CCC-ah dah lova anmahni hmun-a hri kai enkawlna hmun siam tura ruahman niin hemi atan hian nimin khan ruahmanna pawh siam nghal a ni bawk.

Nimin khan Serchhip District-a CO-VID-19 hri kai enkawl mi pakhat chu hri lakah fihlimin Nursing School CCC atanga chhuahtir a ni ve leh a, nimin-a hri kai enkawl dam hi tun thla ni 17 a hri kai hmuhchhuah niin Serchhip Vengchung ami, hri kai hmuhchhuah tawh nen inkawmhnaih avanga hri kaichhawng a ni.

Heti hian nimin thlenga Serchhip District-a COVID-19 hri kai hmuhchhuah chu mi 264 an tling ta a, an zinga mi 189 te chu enkawl dam ni tawhin tunah hian hri kai enkawllai mi 74 an la awm mek a, an zinga mi 8 te hi Nursing School CCC-ah enkawl niin Home Isolation mi pahnih an awm a, a bak mi 64, Mizoram Police mi leh sa te hi anmahni hmun-ah enkawl an ni dawn a, Serchhip District-a hri kai hmuhchhuah zingah nunna chan mi pakhat a awm tawh bawk a ni.