Latest News

MNF in Serchhip-ah Campaign Office an hawng

Serchhip bial Assembly bye-election neih tur atan MNF party chuan Ningani khan Ser-chhip-ah Campaign Office hawngin MNF Adviser, Lalruatkima chuan Campaign Office hi a hawng a ni.

Serchhip Venglai-a MNF Hnam Run sak mek-a MNF Campaign Office hawnna hunah hian MNF Adviser, Lalruatkima chuan Serchhip Bial-a Assembly bye-election neih tur avangin Serchhip Bial mipuite chu an vanneih hle a a hriat thu sawiin, “Opposition bial niin kum 2 chuang in awm a, hmasawnna chak tawk lo a awm thei a ni. Sawrkarin Opposition bial a hrek tihna a ni lo. Sawina tur dik Address hre sa, bial tana sawitu an awm a ngai thin a ni,” a ti a. Sawrkar kal mek-a bye-election neih tawh-ah Vanlalzawma chu a ding lo tih sawiin, tuna din tir a ni chu Chief Minister duhsakna a nih tawh thu a sawi a, “Ruling MLA neihna hun tha in neih hi bawhpelh lo hram turin Serchhip bial mipuite ka ngen a ni,” a ti bawk.

MNF Adviser, Lalruatkima chuan Ser-chhip bial-a hmasawnna hrang hrang thawk tur te, Zawlpui ruam-a loneitute tana hna tak tak thawk tur te leh hmasawnna awmze nei tak tak kalpui turin an Candidate, Vanlalzawma chu a tling tawk tih a sawi a, “Serchhip bial hian Development lo thlang-tling hram turin ka ngen a che u,” tiin Serchhip Bial dinhmun thlirin Ruling bialtu MLA neih chu a mamawh ber nia a hriat thu a sawi bawk.

Serchhip East Block MNF President, C. Vanlalsiamthara kaihhruai he hunah hian MNF Official Candidate, Vanlalzawma pawhin Serchhip-a MNF Party Office, Mizo Hnam Run-ah Election Campaign Office hawn a ni ta chu lawmawm a tih thu leh MNF chanchin ah Serchhip tana hriat reng tawh tur a nih thu a sawi a. Tun tuma Assembly bye-election lo awm turah Pathian leh mipui zarah hnehna an chan ngei a beisei thu a sawi bawk.

Comments

Chhiar Hlawhte