Latest News

Chanchin thar thenkhat :

NHIDCL in Ambulance 4 hlan

National Highway & Infrastructure Development Corporation Limited (NHIDCL) chuan Inrinni khan Health & Family Welfare Minister, Dr R. Lalthangliana hnenah Tata Motor Ambulance pali (4) chu MINECO kawtah an hlan a, he hunah hian NHIDCL-in a hun taka Ambulance Mizoram sawrkar hnenah Social Responsibility ngai pawimawha an hlan chu lawmawm an tih thu Health Minister chuan a sawi bawk. Health Minister chuan COVID-19 do letna kawngah mitinin tan lak thar a ngai tih pawh sawiin, sawrkar SOP enin tih tur leh tihloh tur te hria a, uluk taka zawm zel turin mipuite a chah nawn leh bawk. He hunah hian Dr. ZR. Thiamsanga MLA pawhin NHIDCL chungah lawm-thu a sawi bawk.


Khawzawl-ah DC hovin sawiho

Zirtawpni khan Khawzawl DC, Zothanmawia hovin an District chhunga Pradhan Mantri Gram Sadak Yojana (PMGSY) kawng laih leh District kaltlanga kuhva phurh chungchang sawihona neih a ni a. PMGSY Project an neih te chu March 31, 2022-a tawp tur a nih avangin chak zawka hmalak dan tur sawiho a ni a. Dan phalloh a ram-pawn atanga kuhvarah leh bungraw dang, District kaltlanga phurh thin chuan kawng laih mek a tibuaiin a timuanga, kawng laih sa a tihchhiat bawk avangin tihtawp a nih theih nan lungrual leh thahnem ngai taka thawhho nise an ti bawk.

Mi 2 in Exam zo theilo

Mizoram Board of School Education-in pawl X leh XII exam 2021 a buatsaih ah COVID-19 vangin zirlai pahnih in exam an chhunzawm thei lova, MBSE hotute sawi danin Exam chhunzawm thei lo mi pahnih te hi Matric (Class X) exam ve ve an ni a, hripui an kai avangin an exam chhunzawm thei lo a ni. MBSE thawktute chuan exam chhunzawm thei ta lote tan hian a hranpain ruahmanna an la siam dawn tih an sawi. Result a chhuah rualin an exam hun tur hi puan ve nghal theih an beisei tih an sawi bawk.


ZPM in lawmthu an sawi

ZPM General Hqrs. chuan nimin khan thu-chhuah siamin Serchhip bial bye-election Pathian zara tluang taka zawhfel a ni ta chu lawmawm an tih thu thuchhuah siama tarlangin, he inthlan avanga hun, tha leh zung mai bakah thahnemngai taka sum leh pai thawhtute zawng zawng hnênah lawm-thu an sawi a, Pathian zarah hnehna pawh an chan ngei an beisei thu an sawi bawk. ZPM chuan an Candidate lo vote tute zawng zawng chungah thinlung taka lawmthu sawiin, ram siamthatna atan nasa lehzuala thawk chhuak zel tura an beisei thu an sawi bawk.

Comments

Chhiar Hlawhte