Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Chanchin thar thenkhat :

Kangmei vangin harsatna

Nimin khan Mizoram hmun hrang hrangah kangmei vangin harsatna nasa tak a thleng a, Lawng-tlai District chhung, hmun hrang hranga kangmei chhuakin, Bungtlang South-ah chenna In 14 a kangral a, Chenna In 14 kang zinga 12 chu bungrua engmah chuh hman lohva kangral vek a ni a, vanneihthlak takin nunna chan leh hliam tuar an awm lo ni hriat a ni. Inrinni chawhnu lama Lung-lei District chhung Saisih ruam atanga kangmei chhuak chuan Lunglei khawpui-ah buaina nasa tak a thlen bawk a, kangmei chhuak hi a nasat deuh avangin kangthelhtute pawh an indaihlo hle a, Aizawl lam atangin kangthelh tur hian lir-thei leh mihring pawh tirh belh an ni nghe nghe a, kangmei hi mit mai tur nia a ala lan loh avangin Chief Minister, Zoramthanga chuan nimin khan Indian Air Force (IAF) hotute bia-in, Lunglei ram kang thelh tura hmalak pui turin a ngen a, Vawiin lam hian an rawn thawhchhuah beisei a  ni bawk.


Aizawl tuilakna Media in tlawh

Aizawl khawpui chawmna atana PHE Department in Tlawng lui an lakna chu Inrinni khan thuthar thehdarhtu thenkhat te chuan an tlawh a, he hunah hian anmahni lo dawngsawngtu PHE Department hotute chuan an dinhmun an lo hrilh a, Inrinni-a Tlawng tui luang zat an tehah 31.679 MLD niin; April ni 19, 2021-a tehna hnuhnung ber 31.461MLD aiin tui luang zat a tam hret a. Hetihlai hian, kum 2019-a tui tlem lai ber April 29, 2019-a an tehah 70.742 leh kum 2020-a tui tlem lai ber April ni 1-a an teha 65.971MLD aiin tui luang a tlem zawk a ni. PHE Department hotute chuan Tlawng tui luang a kum tela a tlem zel chu an ngaihmawh thu leh Tlawng lui hi tih naupan thar leh (rejuvenate) a tul tih sawiin, chumi atan pawh ruahmanna an siam tawh thu an sawi bawk.


Minister in Lengpui tlawh

Health Minister, Dr. R. Lalthangliana chuan Inrinni khan State dang atanga khualzin mite luhkapui ber, Lengpui Airport tlawhin Lengpui VLTF te nen inkawmna an nei bawk.


March-ah lirthei 3,160 ziaklut

March, 2021 chhung khan Mizoram-ah lirthei 3,160 register a ni a, chhiah (tax) Rs. 3,88,17,120 hmuh a ni tih Ministry of Road Transport & Highway chuan a tarlang. Mizoram a District Transport Office zingah Aizawl DTO chu lirthei register tam ber leh tax hmu tam ber a ni a, lirthei 2,143 register-in chhiah Rs. 2,33,87,040/- an hmu a. Aizawl dawtah Lunglei DTO awmin lirthei 279 an register a, Tax pawh Rs. 35,96,367/- an hmu a ni. Champhai-ah lirthei 231 register leh tax Rs. 33,71,880/- hmuh a ni a, Kolasib DTO-ah lirthei 167 register a ni a, chhiah Rs. 31,77,465 an hmu a. Lawngtlai-ah lirthei 124 register-in tax Rs. 18,36,198/- an hmu bawk. Siaha-ah lirthei 68 ziah luh niin revenue 12,91,901/- hmuh a ni. Serchhip-ah chuan lirthei 106 ziahluh a ni a, Tax Rs. 14,78,929/- hmuh a ni a. Mamit chu lirthei ziah luh tlemna ber a ni a, lirthei 42 ziah luh chauh a awm a. Revenue an hmuh hi Rs 6,77,340/- a ni.


May & June-ah a thlawnin buhfai sem leh dawn

Sawrkar laipui chuan PM Garib Kalyan Ann Yojana kaltlangin May-June 2021 atan a thlawnin buhfai a pe leh dawn niin BJP chuan thuchhuah an siam. BJP Mizoram President Vanlalhmuaka chuan, “Covid-19 hripui leng thawh hnihna in India ram a nuai leh mek avangin mi tam takin ei leh bar zawnna kawngah harsatna kan tawk leh mek a, chuvangin central sawrkar chuan mi harsa te tan May leh June hian buhfai kg 5 a pe leh dawn a, a lawmawm hle a ni," a ti. Vanlalhmuaka chuan, "Sawrkar laipui in PM Garib Kalyan Ann Yojana atan hian cheng vbc. 26,000 a seng dawn a, India ram in hun harsa tak kan tawh lai a Prime Minister hmalakna hrang hrang te hi a fakawm kan tiin a ropui kan ti hle a ni,” a ti bawk.


Kawng siam mek enfiah

Kawnpui leh Khamrang inkar kawngpui, NH. 54 siamthat hna thawh mek chu Inrinni khan Mizoram PWD hotute leh Awithangpa Group YMA (Kawnpui leh a chhehvel) hruaitute chuan a hmunah tlawhin hnathawh dan an enfiah a, helai hmuna hnathawktu Contractor chu Fur ruahtui tlak hma a an hnathawh zo turin an hrilh bawk.

Comments

Chhiar Hlawhte