MULCO-in kum dang aiin thil an hralh tlem

Mizoram Milk Producers’ Cooperative Union (MULCO) chuan COVID-19 hripui leng vangin an bawnghnute siamchhuah an hralh tlem a, kum 2020-21 khan bawnghnute litre 17,20,763 lakhawm in litre 14,88,061 an hralh.

MULCO hotute sawi danin, Covid-19 hripui len hma 2018-19 chhunga Society atanga bawnghnute an lakkhawm chu litre 24,18,268 a tling a, hei hi kum hmasa 2017-18 chhunga an lakkhawm litre 21,20,847 aiin litre 2,97,420 zetin a tam zawk a. Kum 2018-19 chhungin bawng-hnute litre 20,08,030 an hralh a, hei hi kum 2018-18 a bawnghnute hralh litre 18,09,405 aiin litre 1,98,624-in a tam zawk bawk a ni. 

Sawrkar kum liam ta, 2020-21 ah erawh Covid-19 hripui leng vangin bawnghnute lakkhawm leh hralhchhuah zat a tlahniam a. Kum liamta, 2020-21-in hri len hma 2018-19 a bawnghnute hralh chhuah zat a phaklohna chu litre 5,19,969 a tling a. MULCO report 2018-19 a tarlan a nih danin, MULCO hnuaiah Affiliated Society 33 an awm mek a, chung Society-ah chuan member 742 an awm a, chung zinga mi 356-te chuan MULCO-ah bawnghnute an chhung a. MULCO hnuaia member-te bawng vulh zat chu 2,225 a ni. MULCO hian bawnghnute bakah, bawnghnute atanga siam Paneer, Dahi, Lassi, Dahi cup, Rasmalai, Rosgulla, Gulab jamun leh Ghee te an hralh thin bawk a ni.