Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Chanchin thar thenkhat :

Tui harsatna sawihona nei

PHE Department changtu Deputy Chief Minister, Tawnluia hovin nimin khan PHE Department hotute chuan nimin khan Video Conference kaltlangin tunhnaia tui harsatna chungchang an sawiho a. He hunah hian Deputy Chief Minister chuan tui kang avangin thingtlang leh khawpui ah harsatna kan tawk mek tih sawiin, sawrkara a mawhphurtu Department in theihtawp a chhuah chungin khuarelin khawkheng a rawn thlen takah chuan tui hna a lo tlem tial tial tih a sawi a. Dinhmun khirh tak hi mipui te pawhin an hriatthiampui a, ngaihtuahpui pawh an ngai tih sawiin, Emergency Water Supply (EWS) pawh a tul anga bawhzui turin hmalak belh a ni ang tih a sawi bawk. He hunah hian District hrang hranga tui dinhmun leh harsatna an neih te ngaihthlak a ni bawk.


AMC in CM Relief Fund hlan

COVID-19 thawh hnihna avanga hri kai an lo pun chhoh tak zel avang leh, nunna hial chan an awm avangin AMC Councillor zawng zawngte chuan an thla chanve hlawh Rs. 95,000 theuh leh Officers & Staff-te ni khat hlawh, Rs. 2,06,920/- chu nimin khan Chief Minister's Relief Fund for COVID-19 ah an chhunglut a. AMC aiawh te chuan COVID-19 hri dona atana Front Line Worker zawng zawng inpekna te, sawrkar in mipui tana tha a thawh nasat zia hriatpuina leh a tul apianga hman turin heng an sum thawh-khawm hi hlan an nih thu an sawi bawk.


Ralthuam leh ruihhlo man tam

Mizoram Police te chuan April, 2021 chhung hian ruihhlo leh ralthuam chi hrang hrang an man a, Heroin gram 248.69 manin hei hi Rs. 8,95,284/- hu a ni a, Ganja Kg. 1.458 manin Rs. 7,290/- hu a ni a, Kuhva bag 1475 manin hei hi Rs. 2,08,27,000/- hu a ni a, heng kaihhnawih ah hian thubuai 34 ziahluh niin mihring 34 man an ni bawk. Hei bakah hian ralthuam chi hrang hrang pawh thahnem tak manin heng kaihhnawih ah hian thubuai pahnih ziahluh niin mi 5 man an awm bawk a ni.

Comments

Chhiar Hlawhte