Thing leh Mau, luitui te renchem taka hmang chunga humhalh zel turin mipuite sawm

Mizoram Forest Service Association (MFSA) chuan kan ram-a thing leh Mau, luitui te renchem taka hmang chunga humhalh zel turin mipuite an sawm.

Mizoram Forest Service Association (MFSA) hian mipuite hnena thuchah an tihchhuah ah Mizoram hmun hrang hrangah tunlai in ramkang, tuihna tlem leh kangchat avangin harsatna kan tawk mek tih tarlangin, Tuihna tlem hi kumin-a ruahtui kan dawn mumal loh vang chu ni bawk mahse, mipuiten hun rei tak chhung tuihna siamtu ramngaw humhalh kawngah hma kan lak that tawk loh vang a ni, an ti a. Hei bakah hian kumin hian hmun hrang hrangah kangmei kan tichhuak nasa hle tih tarlangin, “Vawiin thlengin mi kuthlei te avangin ram ala kang mek a ni,” an ti a. Mizoram Forest Service Association (MFSA) chuan ramngawte kan tihchereu avanga harsatna hrang hrang Mizo mipuiten kan tawh mek leh, ram tichereu lehzual tura ram kan la tikang fo chu pawi an tih thu sawiin, chutih rual chuan, hmun hrang hrang ramkang thelh leh veng tura thawkchhuak thin Village Council-te, YMA leh NGO dangte, Fire Emergency Services Department leh mipui te chu an inpekna hlu tak avangin an lawm hle tih an sawi bawk.

MFSA chuan kan ram rohlu- ramngaw leh nungcha te kan tichereu nasa lutuk chu pawi an ti takzet tih pawh tarlangin, “Kan ramngaw leh a chhunga nunna nei chi hrang hrang (bio-diversity) awmte zinga engemawzat hi India ram State dang leh khawvel hmun dangte pawhin an neih ve loh te an ni a. A ram neitu Mizo mipuiten hlutna chang hre lova nasa taka tichereu a kan suasam laiin, State dang leh ramdang atanga lo kal ten zirbingna (research) neiin thiamna hlu tak tak min puakchhuah khalh mek a ni,” an ti.

Mizoram in tun huna kan harsatna tawh mek, tuihna kangchat/tuihna tlem pawh hi luihnar leh luikam ramngaw kan tihchereu nasat vang te, leivung leh bawhhlawh kan paih nasat lutuk vang te a ni tih tarlangin Mizoram Forest Service Association (MFSA) chuan, “Khawtinin kan tuikhur hnar ramngaw te kan duat loh zel a, sawrkar pawhin luipui reserve-te a humhalh that loh chuan; mi tlem kutah heng kan ramngaw te hi lutin, tun aia nasa zawk tui harsatna hi hun reilote chhungin Mizoram mipuiten kan hmachhawn ngei dawn a ni,” an ti a. Hei vang hian sawrkar Department hrang hrangte, NGO leh mipuite chu ramngaw, nungcha leh kan lui te humhalh turin rilru hmunkhatin ke pen tura sawmin, “Kan theihna zawn theuhah theihtawpin hma ila chhunzawm zel ang u,” an ti a. “Zoram hi kan tu leh fa, tuchhuan lo awm zel turte tan chenna tlak ni turin kan thing leh mau, luituite renchem taka hmang chungin i humhalh zel ang u,” an ti bawk.