Mizoram-a COVID-19 hri kai enkawlna atan Kohhran leh zirna In hmunhma dil tum a ni

Nimin khan Health Minister, Dr. R. Lalthangliana hovin COVID-19 hri vei lo pung leh hluai chungchangah hri kai leh inkhunghranna hmun, Community Quarantine Centre/Covid Care Centre ngaihtuah belh chungchang sawihona neih a ni a. Inkhawmna leh zirna In te chu hri kai enkawlna atana hman theih nise an duh tih an sawi.

Secretariat Conference Hall-a thutkhawm ah hian Health Minister, Dr. R. Lalthangliana chuan Mizoram-ah Covid vei an pun belh zel avangin damlote enkawlna hmunhma ngaihtuah belh a ngai tih sawiin, Aizawl bikah hri kai enkawllai 433 lai an awm avangin an sang fal hle tih a sawi a, Covid Frontline-a thawkte chu sawrkar danah Vaccine lak la hun chiah lo mahse, a bika ngaihtuahsak hma nise a ti bawk.

He thutkhawm ah hian hri kai enkawlna atana hman mek, ZMC leh BSUP Building te chu Khum a khah rih thu sawi a ni a, chhuak an awmin a tharin an luah khat leh nghal zel a. Hei vang hian Community Quarantine Centre/Covid Care Centre kan neih tam a ngai tih tarlan niin tuna Inkhawm leh School kal a theih rihloh chhung hian an hmunhma te chu Covid veite enkawl nan hman theih nise an ti bawk.

Meeting-ah hian Kohhran inhawng thei apiangte hnenah an Kohhran hmunhma chu hri kai damlote enkawl dan tur chungchangah inrawn-khawmna neih nise tia ngenna siam relin, heng hmunte hi bawlhhlawh paihna Motor luh theihna remchang awm theihna nise an ti a. Heng Covid damlote hi a enkawltu Doctor-te tan pawh enkawl a awlsam theih zawk nan hmun hrang hranga tlemte te-a awm lovin, hmun khatah tam deuha indahkhawm a remchan thu an sawi bawk.

He hunah hian nikum lama hri kai zingah Force mi an tam hle laiin tunah erawh chuan hri kai zaa 98 vel chu Civilian niin zaa 2 vel chauh Paramilitary Force an nih thu tarlan a ni bawk.

He thutkhawm ah hian MOT Chairman, Dr. ZR. Thiamsanga bakah AMC hotute leh Health Department hotute, Aizawl DC leh Kohhran aiawh bakah Local Council aiawhte leh sawrkar Official te an tel bawk a ni.