Latest News

Chanchin thar thenkhat :

PWD EE hlui thiamlo chantir

Prevention of Corruption Act Special Judge, Vanlalenmawia chuan PWD EE atanga chawl ta, R. Zatawna s/o Darkhuma (L) Chanmari, Aizawl chu nimin khan thiamloh a chantir a, kum 5 leh a chanve tang turin a hrem. He thubuaiah hian R. Zatawna hi cheng nuai 6.75 eiru a puh a ni a. Judgement atanga a lan damin R. Zatawna hian kum 2006 khan BSNL atangin OFC lines phum nana kawng an tihchhiat siamthatna tur cheng nuai 6.75 a dawng a, hei hi Demand Draft No. 506892 forwarding letter-ah a ziak a, mahse, official record ah pawisa a dawn thu leh a hmanna hi khawiah mah hmuh tur a awm lo tih tarlan a ni. He thubuai ah hian thuhretu mi 13 sawrkar lamin thu an zawtfiah a, R. Zatawna hian tihsual a neih loh thu sawi turin thuhretu 3 a neih bakah Court hian thuhretu dang pakhat koh belh a nih hnuah thiamloh chantirin kum 5 leh a chanve tang tur leh Rs. 40,000 chawi tura hrem a ni.


Jail-ah training buatsaih

Mizoram Youth Commission (MYC) chuan Mission Foundation Movement nen tangkawpin Central Jail, Aizawl-ah niminpiah atang khan Skills Training an buatsaih a, he Training-ah hian Aluminium hmanga Frame leh inchhung/pawn-lam cheibawlna chu Jail tang ten nakin zel-a anmahni kutthemthiamna hmanga an intun nun theihna turin an zir a ni. He Training hi Central Jail Hall-ah neih niin thla khat chhung awh tur a ni.


MNF VC thar 2 a piang

MNF Party chuan thuchhuah siamin Lunglei North bial, Zohnuai leh Phaileng South-a Village Council, ZPM sawrkarna ve ve te chu MNF ah inletin, MNF VC thar an piantir ve ve tih an tarlang a. Zohnuai-ah hian VC Member 5 awmin ZPM Member 2-te chuan MNF zawmin, MNF Member pakhat awm sa nen VC thar an siam nia tarlangin, Phaileng South-ah hian VC Member 3 awmin ZPM leh Congress ticket-a thlan-tlinte chuan MNF zawmin MNF VC thar an siam bawk tih an tarlang.


CADC-ah CEM thar lakluh a ni

Nimin khan Chakma Autonomous District Council (CADC) 10-na a Chief Executive Member (CEM) atan Durjya Dhan Chakma chu CADC Rest House Complex, Kamalanagar-ah rinawmna thu tiam tira lakluh a ni a, CADC-a CEM 3-na niin CEM thar hian Executive Member atan mi pali a ruat te pawh nimin vek khan a puang nghal a ni.

Comments

Popular News (Last 30 Days)