Serchhip bial bye-election-ah candidate 6 awmin Vote nei 19,718 an awm dawn

Serchhip Bial Assembly bye-election lo awm tura Nomination paper thehlut te tana inhnuhdawh hun hawn chhunga inhnukdawk an awm loh avangin he inthlanna ah hian Candidate mi 6 an awm dawn ta a. He inthlanpui neih turah hian Vote nei mi 19,718 an awm dawn a ni.

Tun thla ni 17-a Serchhip bial Assembly bye-election neih tur chungchangah hian Returning Officer leh District Bawrhsap, Kumar Abhishek chuan Inrinni tlai khan Serchhip DC Meeting Hall-ah Serchhip-a thuthar thehdarhtute kawmin he inthlanna neih tur atana inbuatsaihna kalpui mek te a hrilhfiah a. He hunah hian Bawrhsap chuan he inthlanna chuh tuma Nomination Paper thehlut zingah inhnuhdawhna hun hawn chhunga inhnukdawk an awmloh thu sawiin, he inthlanna ah hian Candidate mi 6 an awm dawn thu a sawi bakah an chhinchhiahna (Symbol) turte a tarlang a. He inthlanna neih turah hian Polling Station zawng zawngah Vote thlakna khawl, Electronic Voting Machine (EVM) leh VVPAT te hman a ni dawn tih sawiin, Vote thlak hun hma ni 5 zel ala awmah Vote nei te hnenah hian ‘Voter Information Slip’ sem a ni dawn tih a sawi a, hetah hian Vote nei te nihna kimchang leh an vote neihna te tarlan a ni dawn tih sawiin, hei hi Vote thlak tur ten Vote thlakna hmunah ken tur a nih thu leh EPIC chu ken tur a nih thu a sawi a, engemaw remchan lohna avanga EPIC keng theilote tan anmahni tih chianna tur hman theih chi 11 te a tarlang bawk.

Tun tuma inthlanna neih turah hian Polling Station 29 a awm dawn thu pawh sawiin, Vote nei mi 19,718 an awm dawn thu a sawi a, heng zinga 19,520 te chu General Voters niin mipa 9191 leh Hmeichhia 10,329 niin Service Voters 198 awmin an zinga pahnih chu hmeichhia an nih dawn thu a sawi a. Vote thlak hun hi zing dar 7:00 atanga tlai dar 6:00 thleng a nih dawn thu sawiin, Vote nei tamna ber Polling Station Serchhip-X ah vote nei 921 awmin Vote nei tlemna ber Neihloh Polling Station-ah vote nei 221 an awm thu a sawi a. Vote thlak hun tawp hnua Vote thlak zawh hmanlohna a awm a nih chuan Polling Area-a awm te tan Vote thlak theih tura rua-hmanna siam a nih thu a sawi bawk.

Kumar Abhishek chuan, vote thlak ni-a Covid-19 laka himna tura Election Commission of India leh State sawrkar ruahmanna te tha taka kalpui a nih tur thu pawh tarlangin, Polling Party te chu Covid-19 invenna hmanraw tulte pek an nih tur thu te, vote thlaktu mipuite tana Sanitizers chhawp a nih tur thu te; voters kum 80 chunglam te tan te, PwD te tan te, Covid-19 patient leh quarantine-a awm mek te tana Postal Ballot hmanga Vote thlakna ruahman a nih dawn thu sawiin, PwD mi 120 vel awmah mi 67 ten Postal Ballot hi dilin heng mite hi enfiah leh mek an nih thu a sawi.

Inthlan puan a nih rualin Model Code of Conduct viltu- Expenditure Monitoring Team te, Media Certification and Monitoring Committee te chuan hna an thawk nghal a, Static Surveillance Team pathumte pawhin Gazette Notification chhuah atangin hna an thawk tan ve leh nghal bawk a. Election atana thawktu inruat te, Model Code of Conduct leh Expenditure Monitoring training pawimawh te neih tawh niin, luang taka engkim kalpui a nih thu a sawi a, tun thlengin MCC bawhchhiatna lian tham a la awm loh thu pawh a sawi bawk.

He hunah hian Serchhip District Superintendent of Police, Stephen Lalrinawma pawhin dan leh thupek kenkawh kawnga Police hmalak dan tangpui sawiin, Polling Station tinah Police pahnih dah an nih tur thu te, Special Drive an neih mek thute, Constituency chhungah check post siam belh a nih tur thute leh hmalakna pawimawh dangte a tarlanga ni.

He hunah hian Addl. DEO, Lalmuan-sanga Ralte leh Asst. RO, Amol Srivastava bakah inthlan buaipuitu Officer pawimawh te telin zawhna leh chhanna hun hman a ni bawk.