Latest News

Serchhip-ah Bawrhsap hovin hri leng dona kawnga hmalak dan tur sawihona neih a ni

Mizoram sawrkar in COVID-19 hri leng avanga inkhuahkhirhna dan thar a siam bawhzui dan tur chungchangah nimin tlai khan Serchhip khaw chhunga VC hrang hrang aiawhte leh District thuneitute chu an thukhawm.

He thutkhawm Serchhip DC Conference Hall-a neih ah hian District Bawrhsap, Kumar Abhishek chuan hrileng thawh hnihna hi a hmasa aia hlauhawm zawk a ni tih a hriat theih tih sawiin, “Mitin kan fimkhur a tul hle a ni,” a ti a. Kum kalta lamah VLTF ten hri leng laka kan him tlan theih nan rim takin hna an lo thawk tawh tih sawiin, tun tumah pawh hian theihtawp chhuah leh turin a sawm a. Aizawl Municipal Area leh District khawpuia inkhuahkhirhna dan sawrkarin a siam thar chu khauh tak kenkawh tur a ni tih sawiin, chu hna thawk tur chuan pheikhai ruala an thawhho a tul thu leh loh theihlohna avanga Veng bil inkharkhip tul a awm anih chuan District thuneitute hnen thlen turin a ngen bawk.

Thutkhawm kaihruaitu Serchhip Addl. DC, Lalmuansanga Ralte chuan India ram ril zawkah hri kai an tam hle tih sawiin, Mizoram-ah pawh State dang atanga lo haw thar ten an kai nasa in a darh chho mek a ni tih a hriat theih tih a sawi a. Damdawi lama inenkawlna hmun kan neih tlem dan te rilru-a hre reng chungin kan kai darh vak hmaa kan lo inven chu a tul takzet tih sawiin, VLTF te nen theihtawp chhuaha an beih tlan a tul takzet thu a sawi a, VLTF te chu thawhpuiah a sawm bawk. Addl. DC chuan Bazarpui-ah Bazar khawm a rem dawn lo tih sawiin, Dawr in hawngte pawhin mahni Veng VLTF te hriatpuina a hawn a ngai dawn tih a sawi bawk.

Police thawktute lam indaihlohna avangin VLTF tel lo chuan inkhuahkhirhna dan lekkawh kawngah hma an lak tak tak theih loh thu Serchhip Addl. SP, PC. Laltanpuia chuan sawiin VLTF te chu thawhpui atan a sawm a. In khuahkhirhna dante pawh uluk taka chhiar tura ngenin, VLTF duty tur ten chiang taka hre theuh turin a chah a ni.

He hunah hian Dr. Lalhlunpuii, DIO pawhin tul tawpah lo chuan pawn chhuak lo tura inzirtir a tul hle tih he hunah hian sawiin, chhiatni thatni ah pawh sawrkar kaihhruaina chu zawm hram hram turin mipuite a ngen a. Hmun dang atanga lo hawte tan in khunghran a pawimawh thu leh chawlhkar khat (1) hnu lamah chauhte a natna alan chhuah thin avangin dawhthei taka ngaihchan a tul thu a sawi a. Hri kai inrinhlehlhna nei tan District Hospital-ah Rapid Antigen Test (RAgT) Rs. 200 leh TrueNat Test Rs.1000-a tih theih a nih thu a sawi bawk.

Serchhip District-a mipui khuahkhirhna thenkhat :

  • Pawn chhuak reng rengin hmai tuamna, Face Mask emaw, hmanraw dangin emaw hmai an tuam vek tur a ni a, mi dang nena feet 6 tala inhlatin an awm tur a ni.
  • Chhungkaw nitin mamawh dawr hrang hrangte chu VLTF remtihna leh ruahmanna in hawn phal a ni ang a, tlai dar 5:00-ah khar vek tur a ni ang.
  • Bazar hmunah chawhmeh leh thildang zawrh phal a ni lo a, VLFT-te ruahmannin mahni veng chhung theuh ah Veng miten an mamawh an lei theih nan hmun remchang laiah chawhmeh leh thildang zawrhna siam a ni ang.
  • Bawlhhlawh paih motor a lo kalin bawlh-hlawh paihtute'n hmai tuam ngei tur a ni.
  • Dawrkai reng reng leh dawr-a thil lei ten an hmai an tuam tur a ni a. Dawr neituten anmahni dawrtute chu register-ah ziaklutin emaw, Sulhnu app hmangin emaw mumal takin chhinchhiah vek tur a ni. Hei hi hnu chhui nan a pawimawh avangin tih ngei tur a ni. 
  • Contact tracing a chhui telte bakah Mizo-ram pawn atanga lo lut, RAgT negative-te pawh ni sarih (7) chhung khauh taka Home quarantine tur an ni.
  • Home quarantine-a awm chhungkaw member-te pawh pawn chhuaklo leh inleng te nena inchiahpiah lovin ni 7 chhung an awm tur a ni.
  • Home quarantine-na hmun mumal neilo te tan Veng/Khaw tinin Community Quarantine Facility pakhat theuh neih tur a ni a, VLTF in hmun remchang tur ngaihtuahin DC hnenah an report ang.
  • Mipui mamawh bungrua leh hnathawh-na bungraw chi hrang hrang phurtu motor mahni Veng/Khua-ah luh khap loh tur a ni.

Comments

Chhiar Hlawhte