Ni 76 hnuah hri kai hmuhchhuah leh a ni

Nimin khan Serchhip-ah COVID-19 hri kai mi pakhat hmuhchhuah leh niin ni 76 hnuah Serchhip District-ah hri kai hmuhchhuah an awm lehna hmasa ber a ni.

Serchhip CMO Office atanga thu kan dawn danin nimin khan Serchhip-ah Rapid Antigen Test hmangin Sample 6 enfiah niin heng atang hian hri kai mi pakhat hmuhchhuah a ni a, he hri kai hmuhchhuah hi kum 21-a upa, Serchhip Chhim Veng mi niin April 5, 2021 khan Lengpui Airport-ah rawn tumin RT-PCR Test Negative result nei a nih avangin Lengpui Airport-ah hian Rapid Antigen Test hmanga enfiah a ni lo thung a, Lengpui atang hian Bike hmanga rawn hawin khawsik leh taksa nuamlo a nei zui a, hei vang hian nimin khan a Sample enfiah niin COVID-19 hri a kai tih hmuhchhuah a ni a, nimin vek khan Nursing School CCC-ah dahluh nghal a ni. Hetianga hri kai hmuhchhuah a nih avang hian hri kai in a lo kawmhnaih te chhui hna chu thawh nghal a ni a, a chhungte pawh In lama inkhung-hrang tura tih nghal niin a tul angin an Sample enfiah hna hi thawh chhunzawm tur a ni ang.

Kumin January 20-a Serchhip District-a COVID-19 hri kai hmuhchhuah a nih hnuah tun tum ami hi hri kai hmuhchhuah leh hmasak ber niin ni 76 hnuah hri kai hmuhchhuah leh an awm chiah a, ni 66 hnuah Serchhip District-ah hri kai enkawl an awm leh ta chiah bawk a ni. Heti hian nimin thleng khan Serchhip District-ah COVID-19 hri kai hmuhchhuah mi 181 awm tawhin an zinga mi mi 179 te chu enkawl dam an ni a, hri kai enkawllai leh nunna chan mi pakhat ve ve an awm a ni.