Sawrkar hnathawk duty tan; VLTF Duty awm manglo

COVID-19 hri leng hluar thar leh mek avanga mipui khawsak phung khuahkhirhna kengkawh turin nimin atang khan Serchhip-ah COVID-19 Executive Duty te VC Area hrang hrangah an Duty leh tan a, VC tam zawkah chuan VLTF duty hmuh tur an awm tawhlo thung.

Mizoram sawrkar in thla thar May 3 zing dar 4:00 thleng atana hman tur COVID-19 hri leng avanga mipui khuahkhirhna a siam te a tul anga bawhzui leh kengkawh tura sawrkar hnathawk leh sawrkar atanga hlawh la te chu COVID-19 Duty tura hman theih a tih angin nimin atang khan Serchhip khawpui chhunga VC Area hrang hrangah COVID-19 Executive Duty te chu an Duty ve leh tan a, VC Area tinah hian Executive Duty hi Team pahnih zel siam niin zingdar 9:00 atanga tlai dar 5:00 thlengin an duty thin dawn a ni.

Heng Executive Duty zinga thenkhat te hi nimin khan kan Palai chuan an duty-na hmunah tlawhin an hnathawh dan te a zawtfiah a, Executive Duty te chuan hri leng avanga sawrkar in mipui kaihhruaina a siam te chu mipuite pawhin an zawm tha thawkhat viau nia sawiin, Dawr leh sumdawnna hmun hrang hrangte hawn ni mah se khawlai-a mipui vakvel hmuh tur erawh an awm tamlo hle tih an sawi a, khawlai-a vakchhuak awmchhun te pawh lirthei-a teichhuak leh tihtur pawimawh bik nei te an nih thu sawiin, Dan bawhchhia man tur pawh an awm lemlo tih an sawi a. Khawlai-a vakchhuak zingah hmai tuamna hmang thalo hmuh tur an awm zeuh zeuh thu sawiin, heng te pawh hi a nihna tur ang taka Hmai tuamna hmang tura an hrilh thu leh zawm duhlo an awm a nih erawh chuan Dan anga chawitir zel an nih dawn thu an sawi bawk a ni.

Hetihlai hian VC Area tam zawkah chuan Village Level Task Force (VLTF) Duty hmuh tur an awm tawhlo thung a, nimin-a kan Palai in a tlawh zingah Chanmari VLTF te chauhin Duty hi an kalpui tawh niin a lang bawk.