Latest News

Chapchar Kut hlut dan ngaihtuah a tul

Image
Mizo ten Kut chi thum kan neih zinga tun thleng kan la hmanlar ber Chapchar Kut chu kumdang ang bawkin kan lo hmang zo leh ta a, kumin hian Serchhip bikah chuan thil thar leh danglam lutuk awm lovin mipui ten an beisei thin ang ngeiin ‘Phullem chung ah’ Chapchar Kut hi kan hmang a, kan Mual in min dawl zoin kumdang-a harsatna kan tawh thin tam tak kan tawk lo thung niin a lang a, mipuite pawhin kan Phullem kan roh in kan dimdawi hle a, hetiang bawk hian sawrkar in mipuite tana hmasawnna hna a thawh te hi neitu rilru pu in enkawl ila, a tichhetu ni lo a a venghimtu kan nih zui zel hi a tul hle a ni.

A thlawna buhfai sem dan tur buaipui mek a ni

Sawkar laipui chuan COVID-19 hri leng avanga harsatna tawkte tanpuinan buhfai a thlawna sem turin ruahmanna a siam a. He ruahmanna kalpui turin Mizoram pawh a inbuatsaih mek.

Pradhan Mantri Garib Kalyan Anna Yojana (PMGKAY) Scheme hnuaiah sawrkar laipuiin Covid-19 hrileng avanga harsatna tawkte tanpui nan National Food Security Act hnuaia beneficiary zawng zawngte tan May leh June thla chhung hian buhfai a thlawna sem turin ruahmanna a siam a. Mizoram-ah pawh he ruahmanna kalpui tur hian FCI te nen inberawnin, buhfai sem dan turte buaipui mek a ni.

Hemi chungchangah hian Food, Civil Supplies & Consumer Affairs Director Ramdinliani chuan, May leh June thla chhung hian chhungtin in an ration khulh theih zat quota pangngai (normal quota) bakah, mi pakhat tan buhfai a thlawna kg. 5 zel lak theih a nih tur thu a sawi a. Buhfai sem tur te hi a tam tham deuh avangin tunah hian FCI te nen inberawnin buhfai sem dan turte buai-pui mek niin, May thla chhung hian insemchhuah hman hram an inbeisei thu a sawi.

Thingtlang atanga Aizawl-a inhlawha awm mek, an chhungkaw Ration Card-a hming chuang te pawhin, he ruahmanna hnuaiah hian an awmna Veng-a Retailer te hnenah Ration Card keng kher lovin, Adhaar Card No. an hriat chuan an ei tur Ration chu an awmna Veng-a Retailer te hnen atangin a lak theih dawn tho a ni.

India khua leh tui, tu pawhin India ramchhung khawi hmunah pawh an awmna hmun apianga an chanpual Ration an lak theihna tura sawrkar laipui hmalak na, 'One Nation, One Ration Card' programme chu Mizoramah pawh kalpui mek a nih thu leh mipuite pawhin tangkai takin hmang se an duh thu FCS&CA hotute'n an sawi bawk.

Comments

Popular News (Last 30 Days)