Latest News

Hri kai mi 62 hmuh belh leh

Nimin khan Serchhip District-ah COVID-19 hri kai mi 62 zet hmuhchhuah belh leh an ni a, hri kai hmuhchhuah thar zinga a tam zawk te hi Serchhip khawpui chhung ami te niin Khaw-bel-ah mi 13 hmuh belh an ni a, Thenzawl-ah pawh hri kai pakhat hmuh a ni bawk.

Serchhip District-ah Myanmar atanga raltlan mi 70 chuang an rawn lut tawh

Tunhnaia thenawm ram Myanmar atanga Serchhip District chhunga raltlan rawn lut chu mi 70 chuang an ni tawh nia chhinchhiah a ni a, a tlangpuiin heng raltlan te hi mahni chhungte bel-a rawn kal niin a then chuan hmundang an pan leh tawh a ni.

 Sub-Hqrs. YMA Secretary, PC. Vanlalluna chuan Serchhip District chhunga raltlan lo lut zat hi chhinchhiahin Central YMA-ah report an pe thin tih sawiin, Central YMA-a report an thehluh tawhah chuan Serchhip District pumah mi 70 chuang an ni tawh tih a sawi a, hetihlai hian report an thehluh hnuah hian Branch YMA atanga report an la dawn si loh, rawn luh belh an awm laiin report-a thehluh zinga mi awm leh tawh lo, hmundang-a kal leh tawh an awm tih a sawi bawk. Serchhip Sub-Hqrs. YMA President, Kawlthuama chuan Myanmar atanga raltlan chungchangah hian “Kan khawchhak unaute hi kan Mizo hnahthlakpui, kan thisen zawmpuite an ni a, chuvang chuan tha tak leh dimdawi taka an mamawh ang te leh an harsatna te lo phuhruk hi kan tihtur a ni a, YMA-te pawhin kan lo chhawmdawl hi kan tihtur a ni,” a ti bawk.

Hetihlai hian Serchhip khawpui chhunga Village Council leh khawtlang hruaitu hrang hrang te zawhchianna atanga a lan danin Myanmar atanga raltlan hi tun dinhmunah Serchhip-ah mi 50 chuang an awm mek a, heng raltlante hi Veng hrang hranga awm niin, an chhungte bêla rawn kal an la ni deuh vek a, heng raltlante hi thiamna bik nei leh eizawnna hrang hranga eizawng thin te niin, mistiri te leh chanchinbumite pawh an tel a, zirlai naupang an awm bawk a, hei bakah hian helaia rawn zin sawrkar hruaitu pakhat chu haw chho rih lovin a la châm rih niin thudawnna pakhat chuan a sawi a, Myanmar atanga himna zawnga rawn lutte hian hna remchang apiang an thawk ve rih mai niin thudawnna pakhat chuan a sawi bawk.

Rampawn atanga raltlan te rawn lut te hi hri laka an dinhmun enfiah sak thin an nih bakah inkhunghrang tura tih an ni bawk a, khawtlang hruaitute chuan Myanmar atanga helaia chhungte bêla rawn kal tur an awm a nih pawhin, tunlaia hri leng mek avangin an rawn thlen hmain VC emaw, YMA hruaitute hnenah hriattir hmasak thuai thin ni se an duh thu an sawi bawk.

Comments

Chhiar Hlawhte