Chanchin thar thenkhat :

Hmalak dan tur sawiho

Nimin khan Chief Minister, Zoramthanga hovin Health Minister, Dr. R. Lalthangliana leh H&FW Officer te bakah Finance Officer te chuan COVID-19 thawh hnihna laka mipui himna tura hmalakna tur an sawiho. CM Office Meeting Room-a sawihona hunah hian COVID-19 thawh hnihna chu a hmasa aiin a thawk na zawkin, mipui mimir ah tunah hian inkaidarh an tam tawh hle thu tarlan a ni a. Uar zawka Sample enfiah kalpui a tul thu te sawiin, thawktu indaihlohna phuhruk tura Volunteer Worker lak chungchang te sawiho a ni a. PPE leh Test Kit mamawh te sawiho ni bawkin, hneh zawka COVID-19 do tura inpeih tur chuan mitin kan fimkhur tlan a tul thu te an sawiho bawk.

A&C Director in hawng

Mizoram State Library Internet Center chu nimin khan Art & Culture Department Director, R. Hmingthanzuala chuan a duh leh mamawhtu apiang ten an hman theih turin a hawng a. He Internet Center hi tangkai taka hman a nih theih nan Developing Library Network (DELNET) hnuaiah Membership registration tih niin DEL-NET hian International full text e-books, e-journals , e-manuscripts , e-articles subject hrang hrangah neiin, heng E-resources te hi an website atanga en leh download theih a ni. DELNET hian Inter Library Loan (ILL) an kalpui bawk a, hmun hrang hranga Library awmte lehkhabu in hawh tawn theihna a ni. Hei bakah hian Web OPAC pawh tlangzarh nghal niin Library-a lehkhabu awm zawng zawngte chu OPAC atanga zawn theih a ni a, www.statelibrary.mizoram.gov.in-ah en theih a ni ang.

Vawk thi phumna tur ruahman

Nimin khan Aizawl Municipal Corporation (AMC) Mayor, Lalrinenga Sailo hovin Vety Department hotute chuan Vawk natna, African Swine Fever (ASF) chungchang sawihoin ASF vanga Vawk thi te chu Tuirial, Luangmual leh Hualngohmuna AMC ram-ah phum nise an ti.