Mizoram-ah hri kai pakhat hmuh belh leh a ni

Niminpiah Pathianni-a Mizoram-a Sample enfiah atangin COVID-19 hri kai mi pakhat hmuhchhuah niin nimin khan hri kai mi 5 te enkawl dam an ni.

Niminpiah khan Mizoram-ah Sample 426 enfiah niin hri kai hmuhchhuah hi Rapid Antigen Test hmanga Sample 422 enfiah atanga hri kai hmuhchhuah a ni a, hri kai hmuhchhuah hi Aizawl Ramhlun North ami niin taksa-a hri kai lanchhuahna a neih avanga a sample enfiah ah hri a kai tih hmuhchhuah a ni a, hri a kaina chhui zui nghal a ni. ZMC Laboratory-ah Pathianni khan Sample enfiah awm lovin TrueNat Laboratory-ah Sample 4 enfiah a ni a, hri kai hmuhchhuah an awmlo thung.

Nimin khan Mizoram-a COVID-19 hri kai mi 5 te chu enkawl dam an ni leh a, heti hian nimin tlai dar 5:00 thleng khan Mizoram-a hri kai hmuhchhuah tawh zawng zawng chu 4491 an tling ta a, hri kai hmuhchhuah atang hian mi 4444 te chu enkawl dam ni tawhin hei hi hri kai hmuh tawh atanga chhutin zaa 98.95 an ni a, tunah hian hri kai enkawllai 36 la awmin hri kai zingah nunna chan mi 11 an awm tawh bawk a ni.

Nikhat-ah hri kai nuai khat chuang hmuh an ni :

Pathianni khan India ramah COVID-19 hri kai 1,03,558 zet hmuhchhuah belh leh niin he hri a len atanga India ramah nikhat-a hri kai nuai khat chuang hmuhchhuah an awm tumkhatna a ni. Ministry of Health & Family Welfare chhinchhiahna atanga a lan danin Pathianni khan India ramah Sample 8,93,749 enfiah niin heng atang hian COVID-19 hri kai 1,03,558 hmuhchhuah an ni a, heng mite nen hian tun thlenga India rama hri kai hmuhchhuah chu 1,25,89,067 an tling tawh a ni. Darkar 24 kalta chhung khan India ramah mi 52,847 te chu enkawl dam leh niin heng te nen hian tun thlengin hri kai 1,16,82,136 enkawl dam an ni tawh a, hei hi hri kai hmuh tawh atanga chhutin zaa 93.14 niin tunah hian hri kai enkawllai 7,41,830 an la awm mek a, hri kai hmuh tawh zingah nunna chan 1,65,101 an awm tawh bawk a ni.