Latest News

Minister hlui PC. Zoram Sangliana a boral

Mizoram sawrkar-a Minister pawh lo ni tawh, PC. Zoram Sangliana chu Inrinni khan a boral a, nimin khan vuiliam a ni.

Mizoram-a Congress Party hruaitu hlun leh tum 5 lai MLA atana thlantlin tawh PC. Zoram Sangliana hi April 14, 2021 khan COVID-19 hri a kai tih hriatchhuah a ni a, ZMC-ah enkawl nghal niin amah hi Kal thlak tawh, Zunthlum leh Thisen sang nei, damdawi chi hrang hranga inenkawl mek a nih bawk avangin a tuar na hle a. Damdawi In-a a luh zan atangin Ventilator hman nghal a ni a, hmasawnna tak tak nei thei lovin April 24, 2021 tlai dar 5:20 khan a boral ta a ni.

PC. Zoram Sangliana hi Vahlira (L) fapa niin May 9, 1956-ah a lo piang a, Lalthlamuani nen inneiin fanu 3 an nei a, Kanan Veng, Aizawl-ah an cheng mek a. Kum 1987, 1989 leh 1993 MLA inthlan ah te khan Tlungvel bial atanga thlantlin niin kum 2008 leh 2013 inthlanpui ah te khan Kolasib bial atangin thlantlin leh a ni a. Lal Thanhawla kaihhruai Congress Ministry-ah vawi 3 Minister a ni hman a. Kum 1992 khan term laklawhah Minister of State atan ruat niin kum 1993-ah Minister of State a ni leh a. Kum 2008-2013 chhung khan Cabinet Minister ni lehin bawk a ni.

Comments

Chhiar Hlawhte