Latest News

Health Minister hovin Lunglei-ah hri leng mek chungchang sawiho a ni

Health Minister Dr. R. Lalthangliana hovin nimin khan Lunglei DC Conference Hall-ah sawrkar mi pawimawh ten COVID-19 hri leng mek chungchang an sawiho a. He hunah hian Health Minister chuan COVID-19 hrilengin zual lam a pan zel avangin mipuite kan fimkhur lehzual a tul takzet ih a sawi.

Lunglei District-a sawrkar mi pawimawh te nen COVID-19 hri leng mek chungchang sawihona hunah hian Health Minister, Dr. R. Lal-thangliana chuan COVID-19 hrileng thawh hnihna chu India ramah nasa taka leng mekin Mizoram-ah pawh hri kai hmuhchhuah nitin in an pung mek zel a. COVID-19 hrilengin zual lam a pan zel avangin mipuite kan fimkhur lehzual a tul takzet a ni, tiin mitin ten kan awmhmuna kan tih ve theih COVID appropriate behaviour - Mask vuah that, Kut Silfai uluk leh Social Distancing bakah sawrkarin inkaihhruaina a siam, Standard Operating Procedure (SOP) te a hma aia uluk lehzuala kan zawm thar leh a tul a ni, a ti a. Covid-19 hrileng do kawnga a tir atanga a hmatawnga awm, hun leh tha leh ngaihtuahna nasa taka seng thin tu VLTF-te Lunglei District Veng/khaw hrang hrangah an che chhuak leh mek chu lawmawm a tih thu sawiin, VLTF-te mamawh leh ruahmanna siampui ngai te kawng engkima lo ngaihven pui thin turin DLTF hruaitute chu a chah a. Tun dinhmunah Lunglei District-ah Active Case tam lo mah se, kan fimkhur loh chuan hun reilote karah a pung thut thei anih ti hre reng chungin Lunglei District mipuite chu a hma aia fimkhur zual sauh turin Health Minister chuan a chah a ni.

Health Minister hnenah hian Lunglei Civil Hospital-ah Truenat Quattro (vawi khata sample pali test rual theih) pakhat chauh a awm avang leh a thawktu Technician indaihlohna avangin duh angin Sample test a kal chak theihloh thu lo thlen niin Health Department-in an ngaihtuah sak nghal vat tur thu Health Minister chuan a sawi a. Christian Hospital Serkawn-in Rapid Antigen Test-na hmun, Testing Centre tur chu H&FW Lunglei District hotuten an enfiah vek tawh thu pawh report niin hei hi sawrkarah phalna nghah mek niin approval hmuh thuai a beiseiawm thu tarlan a ni bawk.

Hei bakah hian Lunglei District Oxygen dinhmun a that thu leh Civil Hospital-a Oxygen Plant pawh a function thu tarlan a ni bawk.

Comments

Chhiar Hlawhte