Latest News

Vawk thi awm belh rihlo

Tunhnaiah Serchhip-ah chhan hriatloh-a Vawk thi a awm belh hriat a ni lova, AH & Vety Department hotute chuan hri laka kan ranvulh te a him theihna turin sawrkar thupek te tha taka kan zawm a tul thu an sawi.

Tunhnaia Mizoram hmun thenkhat-a Vawk tam tak, chhan hriat mumal loha a thih chungchang ah nimin khan kan Palai chuan Serchhip District AH & Vety Officer, Dr. R. Lalmakthanga chu a Pisa-ah a kawm a, he hunah hian Serchhip DVO chuan tunhnaiah an huamchhunga Vawk thi chu 13 a nih thu sawiin, Keitum-ah Vawk 9 thi in Chhiahtlang-ah pahnih bakah Thenzawl leh Kanghmun South-ah pakhat ve ve an thih thu a sawi a, tunhnai bikah Vawk thi a awm belh loh thu sawiin, Vawk damlo report an dawn te pawh damdawi te pe-a enkawl a nih hnuah an dampui ve leh mai avangin tun-hnaia Serchhip District chhunga Vawk thi te chu hrileng vang nia an rinloh thu a sawi a ni.

Hri leng laka kan ranvulh te a him theihna turin Serchhip District chhung khaw hrang hrangah mipui zirtirna hun buatsaih chhoh mek niin Serchhip, Keitum, Thenzawl, East Lungdar, Leng leh Sailulak-ah te hetiang inzirtirna hun hi buatsaih niin khawtlang hruaitute pawh an hlut hle nia an hriat thu a sawi a, khawdang dangah te pawh neih chhunzawm an tum thu a sawi bawk.

Serchhip DVO chuan hri leng laka ranvulh a him theihna turin Ran In te fai taka enkawl a pawimawh thu sawiin, a theih anga damdawi (Bleaching leh Chinai tui) hmanga tihfai thin tur a nih thu a sawi a, Ran In-a luh dawnin thawm-hnaw hak bik neih a pawimawh thu leh ranvulhna hmun te midang tlawhpawh tir loh a pawimawh thu a sawi bawk.

Hei bakah hian Serchhip District Magistrate in Vawk leh Vawksa atanga thilsiam dang te lakluh chungchangah khuahkhirhna thupek a siam tawh thu sawiin, hei hi mitin ten kan zawm chuan he hri lakah kan him theih thu leh mipuite tan chi-aina tur a awmloh thu a sawi bawk.

Comments

Chhiar Hlawhte