DoNER Minister in Serchhip bial a rawn tlawh

Development of North Eastern Region (DoNER) Minister, Jitendra Singh  chuan zankhat riak turin nimin khan Serchhip a rawn thleng a, Serchhip bial-a BJP Candidate, Lalhriatrenga Chhangte tan a rawn Campaign a ni.

DoNER Minister hian nimin khan Lengpui atanga Mizoram rawn thlengin Serchhip a pan nghal a, Serchhip a thlen hnu nimin tlai khan Serchhip Auditorium-a Vantlang Inkhawm-ah thu sawiin nizan khan Thenzawl-ah a chhukthla leh nghal a, Vawiin hian Thenzawl-ah hun hmang lehin Vawiin tlai lam hian Mizoram a chhuahsan leh nghal dawn a ni.

Serchhip a rawn thlen hnu hian thuthar thehdarhtute zawhna chhangin BJP chuan Serchhip bial-a bye-election neih turah hnehna an chang dawn niin a sawi a, hnehna chan ringawt chu an thiltum a ni lo tih pawh sawiin, diklo taka Dan chelek a nih hnuah mipui sawrkar dik tak tungding leh turin Serchhip bial-ah an ding tih a sawi a. Serchhip bialtu MLA hmasa chu mipui sawrkar a thil tih awmlo tak leh Dan hmangsual chungin rorellai sawrkar chuan a ban nia sawiin, rorelna dik din thar leh turin BJP chuan he bial hi an chuh tih a sawi a. DoNER Minister chuan Mizoram chu mipui nuai 10 awrh chauh chenna ni mah se hmasawnna kawngah Prime Minister, Narendra Modi kaihhruai sawrkar chuan a en hrang ngailo tih sawiin, State dangte nen hamthatna inang a pek thu a sawi bawk.