Latest News

Prime Minister in State Governor te hri leng a hmalak dan leh hmalak zel dan tur a sawipui

Prime Minister, Narendra Modi chuan COVID-19 hrileng dona kawng leh Hri danna kalpui mek chungchangah nizan hmasa khan State Governor te Video Conference kaltlanga kawmin an hmalakna kal mek leh hmalak zel dan tur te a sawipui.

Prime Minister in State hrang hrang Governor te a kawmna hunah hian Mizoram Governor, P.S.Sreedharan Pillai pawh telin Prime Minister chuan COVID-19 dona kawngah khawvel pumah India ram chu hnathawk tha ber pawl a nih thu a sawi a. Vaccine lak a pawimawh thu pawh sawiin, Testing, Tracking leh Tracing pawimawh zia a sawi a, State tin te tan la chhunzawm turin a chah a. A bikin COVID-19 Test na atan RT-PCR Testing chu a pawimawh tih sawiin, tuna 60% testing RT-PCR ni mek chu 70% ah hlan chhoh a ngai a ni, a ti a. India ram chu hri danna pek chhuak kawngah mi vbc. 10 pe hmasa ber a nih thu a sawi bawk.

Prime Minister chuan State Governor te chu tunhma aia tan la tur leh an theihna zawnah inrawlh tam turin a chah a. Chief Minster te hmalakna thlawp tlat tur te, a tul hun apianga All Party Meeting ko tur te leh Webinar te hmang tangkaia thingtlangmite harsatna te sutkianpui dan zawng tur leh NGO leh Civil Society Covid 19 hrileng dona kawnga sawm turin a chah a ni.

He hunah hian Vice President, M.Venkaiah Naidu pawhin Governor te mawhphurhna sawiin Constitutional Head an nihna angin State tinah Chief Minister te hmalakna thlawp tlat tur te, thurawn te pe a, tanlak ngai lai te pawh kawhhmuh thin turin a chah a. 'Covid19 Appropriate Behavior - Hripui leng laka himna tura zawm leh nunpui ngai' zirtirna kawngah Media lam te, Kohhran hruaitute, College zirlaite leh Tlawmngai pawlte theihna te hmang thiam tur leh thawhpuia sawm turin a chah a. COVID-19 dona atan India in mamawh - vaccine, khawl mamawh, a thawktu, thiamna leh experience te a nei tha tawk tih pawh sawiin, a pawimawh ber chu a taka hmalakna kalpui huna tanrual leh thawhhona tha a ni, a ti bawk.

He hunah hian Ministry of H&FW-a Secretary report pekah India ramah Hmaikawr (Mask) vuah tha peih an tlem hle tih tarlan a ni a. India rama cheng mipui 50% chiah in Hmaikawr an vuah a; a vuah zingah hian 14% chiahin an vuah dik a, Mask vuah zinga 64% chu hnar hup lova vuah an ni a, 20% in an khabe tuam nan an hmanga, 2% in an awrh anga hriat a ni. Central Sawrkar chuan State tin te chu Covid 19 Appropriate Behavior zirtirna kawngah tan an lak a ngai tih Health Secretary chuan a tarlang bawk a ni.

Comments

Chhiar Hlawhte