Mizoram-ah hri kai mi 139 hmuh belh leh an ni

Niminpiah khan Mizoram-ah Sample 3712 enfiah leh niin hri kai 139 hmuhchhuah leh an ni a, Mizoram-a COVID-19 hri kai hmuh tawh chu 5879 an tling tawh a ni.

Niminpiah khan ZMC Laboratory-ah Sample 877 enfiah niin heng atang hian hri kai 52 hmuhchhuah an ni a, an zinga 43 te chu hri kai nen inkawmhnaihna nei niin midang 9 te hi State pawn atanga tunhnaia rawn lut te an ni thung. Niminpiah khan District hrang hranga TrueNat Laboratory-ah Sample 126 enfiah niin hri kai pakhat hmuh-chhuah a ni a, Lunglei District-ah 2nd Bn. MAP mi leh sa, hri kai nen inkawmhnaihna nei an ni thung.

Niminpiah khan Mizoram-ah Rapid Antigen Test hmangin Sample 2709 enfiah niin hri kai mi 86 hmuhchhuah an ni bawk a, Lengpui Airport Screening Point-a Mizoram rawn lut tur enfiah atangin hri kai mi 12 hmuhchhuah an ni a, Aizawl District chhung hmundang ah hri kai mi 35 zet hmuhchhuah niin an zinga mi 18 te chu hri kaina hriatloh niin midang hi hri kai nen inkawmhnaihna nei leh State dang atanga rawn lut an ni.

Heng bakah hian Lawngtlai District-ah hri kai mi 17 hmuh niin Serchhip District-ah mi 10 hmuh an ni bawk a, Kolasib District-ah hri kai mi 7 hmuh niin Champhai leh Mamit District-ah hri kai pahnih ve ve hmuh an ni a, Lunglei District-ah hri kai pakhat hmuh a ni bawk.

Nimin khan Mizoram pumah COVID-19 hri kai mi 90 te chu enkawl dam leh an ni a, heti hian nimin tlai dar 7:00 thleng khan Mizo-ram-a hri kai hmuhchhuah chu 5879 niin heng zinga 4882 te chu enkawl dam an ni tawh a, Hei hi hri kai hmuhchhuah atangin zaa 83.04 niin tunah hian hri kai enkawllai 984 an la awm a, hri kai zingah nunna chan mi 13 an awm tawh bawk a ni.