FOCUS Project Review Meeting neih a ni

Mizoram-a FOCUS Project kalpui dan thlirletna chu nimin khan Agriculture Minister, C. Lalrinsanga hovin a Pisa-ah neih a ni a, he hun hi Agriculture Development Board Vice Chairman, H. Biakzaua MLA pawhin a telpui a ni.

FOCUS Project Review Meeting hi COVID-19 hri a pun leh tak avang leh Sawrkar in SOP thar a siam avangin biak hmuhtheihna (Virtual Mode) hmanga neih a ni a. Agriculture Minister chuan FOCUS hnuaia hmalakna hrang hrang te thlirletna leh hmalakna tha tawk lo laite siamtha turin Review Meeting neih a tul thin tih sawiin, thawktute pawh inrawntlanga infuihthar fo a tul thu a sawi bawk.

Agriculture Department hnuaia Externally Aided Project zinga pakhat FOCUS Project hi thingtlang loneitute leh ranvulhtute tana hlawk tak leh tangkai taka hman a nih theih nan theihtawp an chhuah a tul thu Minister chuan sawiin, FOCUS Project Review Meeting chu a vawikhat nana hman a nih thu a sawi a. FOCUS Project chu ram hmasawnna a nih piah lamah environment danglam leh chhe zel veng pah leh ram economy hrut tel a nih thu pawh sawiin, thawktu, a te ber atanga a lian ber thlengin thil thar tha zawk leh kalphung tha zawk thurawn tur an neih chuan hreh miah lova pe turin a ngen a. Jhum Cultivation chu thlak danglam hret hret a, Sustainable Agricultural Farming hmachawpa a awm theihnan thawktute chu tan la zel turin a fuih bawk a ni.

Review meeting hi Meera Misra, Co-ordinator, IFAD, New Delhi chuan rawn telpuiin Mizoram-a loneitute harsatna sutkianna tura hmalakna te a sawi a, he hun hi FOCUS, Project District hrang hrangte nen a hman ho niin, District tin ten anmahni hmun atangin Project hmalakna leh hlawhtlinna hrang hrangte a lem nen entirin an tarlang a ni.

FOCUS Project hi International Fund for Agriculture (IFAD) leh Mizoram Sawrkar thawhhona Project a ni a, Agricuiture, Horticulture, Animal Husbandary & Veterinary leh Land Resources, Soil & Water Conservation lama hmalakna te a huam a. District 6- Champhai, Kolasib, Serchhip, Mamit, Khawzawl leh Saitual District-ah te kalpui mek a ni.