Mi 18,995 in hri danna la zo

Mizoram-ah COVID-19 Vaccine lak tur la zo tawh mi 18,995 awm tawhin hri danna pek hna hi tluang taka kalpui chhunzawm zel a ni.

Sawrkar chhinchhiahna atanga a lan danin kumin January 16-a Mizoram-a COVID-19 Vaccine, Covishield pek a nih atanga niminpiah tlai thleng khan Mizoram-ah Health Care Workers mi 12,325 te chu hri danna Dose 1-na pek ni tawhin mi 10,608 te chuan Dose 2-na la leh tawhin hri danna an lak tur an la kim tawh a. Hri leng dona kawnga thawktu te zinga mi 21,482 te chuan hri danna Dose 1-na la tawh bawkin an zinga 7486 te chuan a Dose 2-na an la leh tawh bawk a ni. 

Hetihlai hian kum upa, kum 60 chung-lam mi 19,646 te chuan hri danna Dose 1-na hi la tawhin mi 756 te chuan Dose 2-na an la tawh bawk a, kum 45 atanga 59 mi 7516 te chuan hri danna Dose khatna lain an zinga mi 145 te chuan Dose 2-na an la tawh bawk a. Heti hian mi 60,969 te chuan hri danna Dose 1-na la tawhin an zinga mi 18,995 te chuan Dose 2-na an la tawh a, hri danna la zawng zawng atanga za zela 31.15 te chuan hri danna an lak tur an la zo tawh a ni.

Serchhip District-ah pawh COVID-19 Vaccine pek hna hi la kalpui chhunzawm zel a ni a, Health Care Workers mi 714 te hnenah Vaccine Dose 1-na pe tawhin mi 698 te hnenah Dose 2-na pek a ni tawh bawk a, Frontline Workers mi 2232 te hnenah Vaccine Dose 1-na pek ni tawhin mi 987 te hnenah Dose 2-na pek a ni tawh bawk. Kum 60 chunglam mi 1371 te hnenah hri danna Dose 1-na pein an zinga 142 te chu Dose 2-na pek an ni tawh a, kum 45 atanga 59 mi 148 te hnenah Dose 1-na pek an ni tawh bawk a ni.