Latest News

COVID-19 Second Wave hluar leh mekah mipuite fimkhur lehzual a ngai hle tih sawi

India ram-a COVID-19 Second wave lo hluar leh mek chu a hmaa COVID-19 hri leng aiin 70% laia inkaichhawn awl a nih avang leh a ziarang diktak mithiamte pawhin an la hriat kim theih loh avangin Mizoram chhunga chengte pawh a hma aia kan fimkhur lehzual a ngai hle tih mithiam te chuan an sawi.

Ningani chawhnu khan Health Minister, Dr. R. Lalthangliana hovin Mizoram-a COVID-19 hri leng dinhmun thlirhona chu SAD Conference Hall-ah neih a ni a, he hunah hian India rama COVID-19 Second wave lo hluar leh mek chungchang thlirin COVID-19 variant thar hi a hmaa COVID-19 hri leng aiin 70% laia inkaichhawn awl a nih avang leh a ziarang dik tak mithiamte pawhin an la hriat kim theih loh avangin Mizoram chhunga chengte pawh a hma aia kan fimkhur lehzual a ngai hle a ni, an ti a. Lo thleng lo tura theihtawp chhuah a tul rualin he Second wave hi hmachhawn tura kan theih ang chinah kan lo inbuatsaih a ngai a, State dangte pawhin an lo inthlahdul tawhna te sutin a hma angin khauh lehzual zawka an kal mek lai hian mipuite pawhin awmhmuna kan tih ve theih, COVID appropriate behaviour - Mask vuah that, Kut silfai uluk leh Social distancing bakah sawrkarin inkaihhruaina a siam, Standard Operating Procedure (SOP) te a hma aia uluk lehzuala kan zawm a ngai a ni, an ti a. Kan hun tawng azirin SOP te pawh a tul chuan siamthat leh a ngai dawn a ni, an ti.

Hriat theih chinah COVID-19 variant thar hi Mizoram-ah a lo la thleng lo nia a lan rualin, tunah hian Mizoram-a COVID-19 positive hmuhchhuah te sample 200 phai lam Laboratory lian ah endik tura thawn leh mek a nih avangin kan dinhmun dik tak a la hriat loh a nih thu he thutkhawm ah hian tarlan a ni a. COVID-19 variant thar (New Strain) hi thalaiten an kai awlsam lehzual nia hriat a nih avangin leh thihpui zingah pawh a hma aiin thalaite an tam zawk avangin chetvelna ah thalaite pawh fimkhur lehzual turin an ngen a, COVID-19 vanga inkharkhip leh inkhuahkhirh chhunga kan tawrhna leh hrehawmna te hre reng chunga hetiang hun kan tawn nawn lohnan mi zawng zawngin mahni theihna zawn zawnah nasa lehzuala tan la thar theuh turin Mizoram mipuite an ngen a ni.

Meeting-ah hian COVID-19 dona hmanrua chi hrang hrang kan neih mek dinhmun tarlan a ni a, tuna kan dinhmun atanga chhutin PPE thla li daih, N-95 mask thla hnih daih, Three Layer Mask thla li daih, Gloves kum khat leh a chanve daih, Hand Sanitizer thla hnih daih, Sodium Hypochloride thla hnih daih, Viral Transport Medium (VTM) thla ruk daih, RAgT thla li daih a la awm thu tarlan a ni a. Kan dinhmun a chhe leh thut anih chuan COVID-19 second wave laka kan inven tlan theihnan uar tak leh ngawrh lehzuala mipuite hnena inzirtirna kalpui thar leh a tul thu sawi niin, a tul anga hmalak chhunzawm nghal a pawimawh thu tarlan a ni bawk.

Comments

Chhiar Hlawhte