Mizoram-ah hri kai 9 hmuh belh niin dam pakhat awm

Niminpiah khan Mizoram-ah Sample enfiah 735 atangin COVID-19 hri kai mi 9 zet hmuh belh leh an ni a, tun thla chhunga hri kai hmuhchhuah tam ber ni a ni.

Niminpiah khan ZMC Laboratory-ah Sample 28 enfiah niin heng atang hian COVID-19 hri kai mi pahnih hmuh an ni a, Aizawl mi ve ve niin tunhnaia hri kai hmuhchhuah tawh nen inkawmhnaih atanga hri kai nia hriat an ni.

Niminpiah khan Rapid Antigen Test hmangin Sample 690 enfiah niin hri kai mi 7 hmuh an ni a, Kolasib District-ah Border Roads Task Force (BRTF) mi leh sa Mizoram-a rawn lut tur enfiah atangin hri kai mi 4 hmuh an ni a. Lengpui Airport Screening Point-ah Mizoram-a rawn lut tur hri kai mi pahnih hmuh ni bawkin Aizawl Kulikawn Veng-a Maxi Cab Driver pakhat, March 31-a Guwahati atanga rawn haw chu taksa ah hri kai lanchhuahna a neih avanga a Sample enfiah sak a nih hnuah hri a kai tih hmuhchhuah a ni bawk. Niminpiah khan TrueNat Laboratory-ah Sample 17 enfiah niin hri kai hmuhchhuah erawh an awmlo thung.

Nimin khan Mizoram-ah COVID-19 hri kai mi pathum te enkawl dam leh niin heti hian nimin tlai dar 6:00 thleng khan Mizoram-ah COVID-19 hri kai hmuhchhuah chu 4500 an tling ta a, hri kai hmuh-chhuah atang hian mi 4447 te chu enkawl dam ni tawhin hri kai hmuhchhuah atanga zaa 98.82 te chu enkawl dam an ni tawh a, tunah hian hri kai enkawllai mi 42 la awmin nunna chan mi 11 an awm tawh bawk a ni.