Kumin ah TB hrik kai mi 18 hmuhchhuah an ni tawh

Kumin chhungin Serchhip District-ah TB natna vei mi 18 hmuhchhuah an ni tawh a, heng zinga mi pahnih te chu TB dam har chi tia hriat, MDR-TB vei an ni.

Serchhip TB Centre atanga thu dan dawn danin kumin chhung hian Serchhip District-ah CB-Naat hmangin Sample 49 enfiah ni tawhin heng atang hian TB hri kai mi 8 hmuh-chhuah an ni a, an zinga mi pahnih te hi Multi-Drug Resistant-TB (MDR-TB) tia hriat kai te niin heng mite hi kum 2 chhung enkawl ngai an ni a, hei bakah hian Microscope hmanga Sample 64 enfiah atangin TB hrik kai pakhat hmuh-chhuah niin Clinically Diagnosed atangin TB hrik kai mi 9 hmuh an ni bawk a ni.

Kumin a TB hri kai hmuhchhuah te nen hian tun dinhmun ah Serchhip District-ah TB hrik kai mi 44 enkawl mek an ni a, heng zinga mi 6 te chu MDR-TB niin midang 38 te hi TB hri kai pangngai te an ni a, kumin chhung hian Serchhip District-a TB hrik kai zingah nunna chan an awmlo a ni.

Serchhip District TB Centre-a thawk-tute chuan khawvel pumin hri leng a buaipui mek, COVID-19 a rawn hluar hnuah TB hri kai te chu COVID-19 Test neihpui zel an nih tawh thu an sawi a, hei bakah hian COVID-19 hri kai hmuhchhuah te pawh TB an kai leh kai loh enfiah zel an nih tawh thu an sawi a. Heng bakah hian TB hrik kai te hi natna chi dang an kai leh kai loh enfiah ngei ngei ngai engemaw zat a awm thu an sawi bawk a ni.