MNF ten Mizo National Day vawi 55-na an hmang

MNF Party chuan nimin khan Aizawl-a Mizo Hnam Run-ah Mizo National Day vawi 55-na an hmang a, an Party hruaitu ten thu an sawi a ni.

Mizo National Day-ah hian MNF Treasurer K. Vanlalauva chuan Mizo National Day hi MNF-in Independence a puan ni a ni tih sawiin, “Kan ni pawimawh zinga a bul tanna a ni a, Inremna kan neih atangin 'Mizo National Day' tia thlak a lo ni ta. Mizoram leh Mizote hi Mizo Lalte hnuaia awm kan ni thin a, British-in min awp a. Min rawn miah lovin India, Pakistan leh Burma-ah min thenhrang a. Kum 1947-ah British sawrkar chuan India ram chu Independent a pe a, Chu'ng ah te chuan Zofate min rawn miah lovin min rinlut ringawt a. Heta tang chiah hian Hnam rilru pu ten ngaihtuahna an seng tan a. India hnuaia kan awm tak hnuah Pu Laldenga-ten 'Kan chanvo dik tak hi min ngaihtuahsak rawh u' tiin an thlen a. Mahse, ngaihsak a hlawh lo. Chuvang chuan March 1,1966-ah Independence puangin kan penchhuak a ni,” a ti.

MNF Vice President, Vanlalzawma pawhin Mizo National Day chu hnam thinlung inzirtir zelna atan hman nise tia an rel anga hman a ni tih sawiin, “Tunah Independent hmu lo mah ila, nakinah kan la hmu mai thei, engtinnge kan hmuh ang tih erawh sawi lawk theih pawh a ni lo,” a ti a. “Kan ram leh hnam mai ni lo, kan sakhua a dam theih nan kan mi hmasa ten Independent puangin ke an lo pen a nih kha. Amaherawh chu, mipuite ngenna avangin Inremnna siam a lo ni a. Vawiin ni thlengin India rama inremna tha ber a la ni reng a ni,” a ti bawk.