Latest News

RD Department in Schedule of Rates (SoR) zirho

Mizoram chhunga Mahatma Gandhi National Rural Employment Guarantee Scheme (MGNREGS) hnuaia hna chi hrang hrang thawhna a hman tura Rural Development Department buatsaih, Schedule of Rates (SoR) chungchang zirhona nimin khan neih a ni.

He zirhona Aijal Club-a neih ah hian Rural Development Department Officer-te, DRDA Project Director leh Block Development Officer-te telin he hun hmanpuitu RD Minister, Lalruatkima chuan Rural Development Department hnuaia thawk Mizoram hmun hrang hrang ami te thawhrimna leh thahnemngaihna azarah kum 2019 leh 2020 chhung khan ni 100 inhlawhna siam a ni tih a sawi a. COVID-19 vanga harsatna kan tawh chhung kum 2020-a ni 100 inhlawhna siam avang khan Job Card nei mi nuai 2 chuangin Rs. 25,000/- vel theuh an la thei tih sawiin, hripui laka kan tawrhna tihnep kawngah pawh nasa takin min pui a ni, a ti.

RD Minister chuan Rural Development Department chu thing-tlang mite innghahna leh retheihna laka khaichhuak tura thawktu an nih ang ngeia innghahna tlak ni chhunzawm zel tura tan la turin a fuih a. DRDA Project Director-te leh BDO te chu an hnuaia thawkte uluk taka an vil thin avangin an hnathawh a tha thin tih sawiin, Bial chhunga hnathawhte a hmunah a tam thei ang ber an enpui hian an hnathawhin belhchian a dawl phah thin a, mahni inrintawkna pawh an neih belhchhah phah thin tih a sawi a. Sawiselna an tawng a nih pawhin rilru nat aiin insiam-that nan hman tum zel tura fuihin, District thar pathum - Saitual, Khawzawl leh Hnahthial-ah DRDA Office hawn thuai a nih tur thu a sawi bawk.

MGNREGS hnuaia hnathawhna atan hian Mizoram PWD SoR hman thin a ni a. Rural Development Department in SoR thar ruahmanin hei hi sawrkar laipui pawhin a pawmpui tawh a, April, 2021 atangin hman tan tur a ni ang. Mizoram hi India ram State zingah MGNREGS SoR nei hmasa pawl a ni a, SoR tharah hian Job Card neitute hriselna, kum zat leh an taksa dinhmun atanga tehin hnathawhna tur rate bithliah fel vek a ni.

Comments

Chhiar Hlawhte