Latest News

Lalduhoma MLA atanga banna-a an hrem tak zawk chu Serchhip bial mipui an ni - K. Sapdanga

ZPM Vice President, K.Sapdanga chuan Serchhip bialtu MLA, Lalduhoma chu maksak taka a MLA nihna hlih sak a nih thu sawiin, he inbanna ah hian Lalduhoma hremna an pe satliah lovin an hrem tak zawk chu Serchhip Bial mipuite an ni tih a sawi bawk.

Nimin-a Serchhip Press Club-a thuthar thehdarhtute a kawmna ah ZPM Vice President, K. Sapdanga chuan tunlai hian Assembly Budget Session a awm mek thu leh MLA-ten ram pum hmasawnna ruahmanin, mahni bial-te hmasawnna tur thahnemngai takin an inchuh mek tih a sawi a. Budget Session-a tel thei lo tur tawk chiahin Serchhip bialtu MLA, Lalduhoma chu MLA a nihna hlihsak a ni tih sawiin, “Lalduhoma hremna an pe a ni satliah lo a, an hrem tak zawk chu Serchhip bial mipuite a ni. Bial mipuite hmuhsitna, ngaihnepna, kum khat chhung hmasawnna tur tihbahlahna a ni tih hi bial mipuiten kan hai loin kan hria,” a ti a. “MLA atanga Lalduhoma bantir a nih chhan an chhuanlam lah chu a bantirtute ngei pawhin mak an la ti reng a ni ang, tun thlengin tuma zawh hleih loh pawhin an la hrilhfiah ngat ngat a ni,” a ti.

K. Sapdanga chuan Lalduhoma MLA nihna hlihsak a ni chu hek tura MLA 12-te thupetu tih loh, hremna petu pawh tiamin midang zawng khan mak an tiin pawi an tih bakah mipui rilru a na niin a sawi a, “Hremna petute pawl hian Law Court lama kal turin an thiam zawng zawng hmangin min vehthlem a, mahse thutlukna siam turin Law Court aiin Bial mipuite kan ring ta zawk a ni,” a ti a. “Thla ruk chhunga bye-election buatsaih a lo ngai dawn ta a, thutlukna nunrawng tak hi mipuiten theihnghilh hman se an duh leh si ni tur a ni, Election Commission lamah Mizoram sawrkar a la inpeih loh thu sawiin, bye-election hi a theih chen chen tikhawtlai turin rawtna a thlen tih thawm kan hria a, kan chhui chiang mek a ni,” a ti bawk.

An Party chu kum thum pumhlum awrh chauh an nih thu sawiin ZPM Vice President chuan, Congress Party chuan pathumna nih hreh viau mah se tunhnaia inthlan result figure-ah a lang tih a sawi a, “Serchhip bial bye-election lo awm turah pawh hian ZPM Party a chak ang tih hi MNF ai mahin Congress party hian an hlau zawk,” a ti bawk.

Serchhip bial mipuite chu MLA chak tak, viak tha tak, bial te thlavang hauh thiam tak, hmasawnna atchilh, rampum thlir rawn tling nei leh thuai tura duhsakna a hlan thu sawiin ZPM Vice President chuan, “Term tharah Chief Minister Bial in nih ngei kan beisei a, chu chu in kutah a awm,” a ti a. “Engtik ah emaw chuan Bye-Election hi chu puan a la ni ang. Chutih hunah chuan, a satute ngeiin tuna i ropuina let sang sawmthum in an rawn thlem ang che, I hnehna puanzar leh i lu i lo thinsan dawn nia,” a ti bawk.

Kumin-a Mizoram Budget pawh Economics Expert-te chuan 'Budget for Sports Development' an ti fiam nia sawiin K. Sapdanga chuan, Budget zawng zawng deuhthaw chuan Sports lam a kâwk deuh a, Sports Department hnuaia sum dah chu Contract Work thawhna tur a tam hle tih a sawi a, hetiang bawk hian Department thenkhat ah pawh a nih thu a sawi a, hei hi Mizoram sawrkarin mipui sum hman dan tur a ruahman a ni a, he Ministry hi kum 5 a ral chuan Minister 2/1 hausa fâl an awm dawn nia an hriat thu a sawi a, Budget vanduai tak, a vanduaina mipui chunga tla tur nia an hriat thu a sawi bawk.

Thuthar lakhawmtute zawhna chhangin K.Sapdanga chuan Lalduhoma MLA atanga bân a nih khan amah chuan Court kal a duh tih sawiin, mahse Party-in Court kal ai chuan mipuia kal an duh zawk tih a sawi a, MLA Fund a hman dan chungchang an pary MLA-te chu zalenna zau tak an pe tih sawiin, MLA Fund-a an hnathawh pawh an thawh zawh tawh chin chu kut a tling em tih chu party-in an enpui chauh tih a sawi bawk.

Comments

Chhiar Hlawhte