Latest News

RD Minister in Leng-ah Aieng sawngbawlna leh Leng Smart Village Project a hawng

Rural Development Department changtu Minister, Lalruatkima chuan Inrinni khan Leng khua tlawhin Aieng herna khawl a hawn bakah ‘Leng Smart Village Project’ chu a hawng.

Shyama Prasad Mukherji Rurban Mission (SPMRM) hmalakna hnuaia Leng khua-a din Turmeric Processing Centre hawnna hunah hian RD Minister chuan mahni ram tharchhuah ngei kan ngaihhluta, tangkai taka kan hman zel a pawimawh thu sawiin, theihtawp chhuaha bei sauh sauh turin Leng Village Organisation te chu a chah a, helai bul hnai mai-a Serthlum vawnthatna an siamchawp pawh Minister hian a tlawh nghal a ni.

Hemi hnu hian RD Minister hian Leng khua-a Saihnuna Hall-ah ‘Leng Smart Village Project’ chu a hawng nghal a, Serchhip DRDA Project Director, Malsawmtluanga kaihhruai he hunah hian RD Minister chuan he Project hian kentel tam tak a neih thu leh khaw awhawm, intodelhna kawnga hmalakna te pawh a huam vek thu sawiin, a hlawhtlinna atan khaw mipuite nen theihtawp an chhuah a tul dawn thu a sawi a. Leng khua in Aieng leh thlai dang hlawhtling taka an ching pawh lawmawm a tih thu sawiin, Mizote chu Hnam rinawm leh taima kan nih a tul thu a sawi a, kan thil tharchhuah te a lo leichhawngtu ten a that bikna an hriat theih a pawimawh thu a sawi bawk.

Mizo mipui ten kan ramngaw kan humhalh loh chuan thangthar te chenna tlakloh-ah kan ram kan chhuah mai a hlauhawm thu pawh sawiin, chutiang a nih laia Leng khua in tuihna humhalhna kawngah rampum huap chawimawina an dawng chu lawmawm a tih thu a sawi a. Faina kawngah nasa taka hma an la pawh lawmawm a tih thu sawiin, Faina chu mahni theuh ah bul tan tur a nih thu a sawi bawk.

He hunah hian East Lungdar BDO, H. Lalhruaitluanga chuan Smart Village Project kalpui dan tur sawifiahin, Smart Village Project hnuaiah hian hriselna kawngah te, eizawnna kawngah te, faina leh thianghlimna bakah khaw tihmawina kawngah te, Digital Learning School te, Insurance te, Free wifi te, Open Gym te, kum upa te tan Recreation Centre te, Green House Farming leh Food Processing Init te, Bazar tha te, Solar Street Light te, Cold Storage te leh khawtlang inrelbawlna tha tinreng te neih tuma hmalak chhoh zel anih tur thu leh tun dinhmunah pawh engemawzat a taka neih anih tawh thu a sawi bawk.

He hunah hian MzSRLM-a Chief Executive Officer, Lalchhandami chuan Leng Village Organisation ten Aieng an tharchhuah chu a tlangzarh a, MzSRLM hnuaia hmalakna hrang hrangah Leng khawtlangin tha taka hna an thawh thin avangin lawmthu a sawi bawk.

Comments

Chhiar Hlawhte