Serchhip-ah Special Handloom Expo neih a ni

Mizoram Handloom & Handicrafts Development Corporation Limited (ZOHANDCO) buatsaih 'Special Handloom Expo-2021' chu nimin khan Serchhip Auditorium tual-ah neih tan a ni.

'Special Handloom Expo-2021' hi Aizawl Municipal Corporation (AMC) Mayor, Lalrinenga Sailo chuan khuallian nia hawngin Mizo ziarang tilang thei kan thilsiam chhuah hrang hrangte khawvel-ah a lar ve tawh hle a a hriat thu leh la tihlar chhoh zel a tul thu a sawi a, a siamtute pawhin rintlak zawk leh tlo zawka an thilsiamte an tihchangtlun ve zel tula a hriat thu a sawi a. Kan hnam zia tilang thei kan thawmhnaw te leh thildang dang kan siamchhuahte chu mipuiten kan hlut chho tial tial dawn chauh a, hetiang lama eizawngtute tan pawh a la hlawk tial tialin a rinawm tih a sawi bawk.

'Special Handloom Expo-2021' hawnna hun hi ZOHANDCO Chairman, C. Lalrammawia chuan a kaihruai a, he Expo hawnna neih zawh a nih hnu hian khuallian hian Auditorium tual-a dawr hawn te tlawhin he Expo-ah hian dawr 25 hawngin Handloom & Handicraft chi hrang hrangte zawrh chhuah nghal a ni a, Serchhip mipui a duh apiangten pan theih niin Vawiin hian helai hmunah vek hian Vendors Development Programme buatsaih zui a ni bawk ang.

Nimin-a he Expo hawnna hunah hian ZOHANDCO thawktute leh Serchhip lama sawm bik Official pawimawhte leh Handloom & Handicraft siamchhuaktute an tel a ni.