Latest News

Myanmar buaina avangin Mizoram-ah mi 11 an rawn raltlan tawh

Tunhnaia India ram thenawm, Myanmar-a tualchhung buaina chhuak avangin nimin khan Serchhip District-ah mi pathum (3) rawn raltlan awm lehin Serchhip District-a rawn raltlan chu mi 11 an tling tawh nia thudawn a ni.

Thudawn danin thenawm Myanmar-a buaina thleng avanga nimin a Serchhip District chhunga rawn lut te hi Lungkawlh khua ah rawn lutin Myanmar Police pakhat bakah a nupui leh a fa pakhat an ni a, heti hian tun thlenga Myanmar atanga Serchhip District-a rawn tlanchhia hi mi 11 niin mi 7 chu Police niin hmeichhia leh naupang pahnih ve ce an tel a ni. Lungkawlh atanga thu kan dawn danin heng rawn lut zinga niminpiah-a North Vanlaiphai lam pan mi pathum te chu Lungkawlh-ah hian kir tir leh niin an vai hian Lungkawlh Community Hall-ah enkawl mek an ni a, heng mite zinga thenkhat hi chuan an chhung leh khat te In-ah ei leh in lamin chhung leh khat nei lemlo te chu an VC ten a remchan angin an ngaihtuah sak nia thudawn a ni.

Hetianga Serchhip District chhunga rawn lut an awm avang hian nimin khan Serchhip District Bawrhsap, Kumar Abhishek IAS leh Serchhip SP, Stephen Lalrinawma te chuan Lungkawlh khua hi tlawhin thil awmdan an enfiah a, heng ramdang atanga rawn lut te hi thlamuang taka awm tura an chah bakah sawrkar in Dan a siam te zawm turin an hrilh bawk a ni.

Mizoram Chief Minister, Zoramthanga chuan nimin-a Aizawl Vanapa Hall-a Chapchar Kut hmanna ah Myanmar a kan unau ten sipai rorelna avangin harsatna an tawh thu hi sawiin, “Loh theih loh-a sa himna zawnga Mizoram lo lutte pawh an tan kan inhawng a ni,” a ti a, sawrkar pawhin ei tur a harsat palh takin an ei tur atan sum a sanction thu a sawi bawk.

Hetihlai hian nizan hmasa khan North Vanlaiphai Village Council leh North Vanlaiphai Joint YMA chuan Joint Meeting neiin tunlai-a kan ram thenawm Burma (Myanmar) ram boruak thlirin hun thim tak leh harsa tak kan unau te hian an hmachhawn mek nia an hriat thu an sawi a. Hemi avang hian kan unau, hun eng zawk beiseia an khawtlang rawn bel an awm a nih chuan thinlung inhawng taka sawrkar ruahmanna ngaichang chunga thlamuang taka an awm theihna tura lo dawnsawn nise an ti a. Hetihrual hian tunlai-ah hripui (COVID-19) leng avangin hun harsa tak kan hmachhawn mek bawk tih hre rengin himna zawnga rawn kal te leh chhung leh khat belh tur nei bakah lo dawngsawng turte pawhin khawtlang hruaitute hriattir hmasa zel turin an ngen bawk a ni.

Comments

Popular News (Last 30 Days)