Dan lova sum lak thin tihtawp nan hma la dawn

Supply Minister, K. Lalrinliana chuan Gas Agency-ten dan lova mipui atanga sum an lak thin titawp turin hriattirna khauh tak chhuah tum a nih tur thu House a hrilh.

Assembly Session neih mekah Aizawl North-II bialtu MLA, Dr. Vanlalthlana'n Gas Agency-ten an duh duhin mipui an tikual a, Connection ti tharte pawh Gas Stove an lei luih tir a, thil chinchang hrelo deuhte phei chu lei luih tir thin an nih avangin hemi titawp tur hian Sawrkar-in Notification khauh deuh tak a tichhuak thei ang em tih a zawhna chu chhangin Supply Minister, K. Lalrinliana chuan, mi harsa leh hnuaihnung zawkten hemi chungchangah hian harsatna an tawh thin avangin dan ang takin Notication chhuah tum a nih tur thu a sawi a ni.

Supply Minister K. Lalrinliana chuan, LGP Connection thar neituten Gas Agency atangin Gas Stove an lei tel kher a tul chuang lo tih sawiin, mimal duhthlanna a ni tih a sawi a. Dan pangngai ah chuan chhungkaw pakhat atangin LPG Connection hi pakhat aia tam an nei thei lova, amaherawh chu pakhat aia tam neih theihna dan erawh a awm tih sawiin, tun dinhmunah Gas Connection hi Single Rs. 4,775 leh Double Rs. 6,850 a ni a, hei hi LPG rate danglam dan a zirin a danglam thei thung tih a sawi bawk.