Chanchin thar thenkhat :

Chhiah lak tihhniam phut

Mizoram Pradesh Youth Congress Committee (MPYCC) chuan hri lengin ziaawm lam a pan hnuah Petrol leh Diesel atanga Chhiah a lak hi tihniam tur leh sawrkar laipui-ah pawh tihniam tura ngawr ngam turin Mizoram sawrkar an phut tih an sawi. Nimin-a MPYCC President's Room-a thuthar thehdarhtute an kawmnaah he thu hi MPYCC chuan an sawi a. Hri leng chhuan-lama hmangin Petrol leh Diesel-a Chhiah lak an tihsan chu tunah hian hri lengin ziaawm lam a pan tak avang leh mipuite tawrhna hi a nasat tawh lutuk avangin a rang thei ang bera chhiah tihniam a, Congress sawrkar laia Petrol leh Diesel atanga chhiah lak zat thin ang tala tihniam turin sawrkar an phut tih an sawi a ni.

He hunah hian MPYCC President, Dr. Lalmalsawma Nghaka chuan, MNF sawrkar in Financial Management an thiamloh avangin Petrol chhiah za zelah 5-in an pun thu leh Diesel chhiah za zelah 2.5-in an pun tih a sawi a ni.

ZPM in ngenna an thehlut

ZPM Party chuan Mizoram-a kawlphetha hman man tihsan tumna chu a sang lutuk nia an hriat thu an sawi. Mizoram sawrkar-a Power & Electricity Department in Tariff Proposal a siam chu mipuite tan phurrit leh harsatna siamtu nia ngaiin, mipui harsatna chhawk zangkhai zawnga ruahmanna siam tura ngenna chu nimin khan Joint Electricity Regulation Commission-a Secretary hnenah ZPM hian ziakin an thlen a, Secretary aiawhin Richard Zothankima, Asst. Secretary chuan lehkha hi a lo dawng a ni. ZPM aiawha lehkha thehluttu an Secretary General, PC. Vanlalruata chuan Mizoram sawrkar-a P&E Department in Tariff Proposal a siam chu ngun taka an zirchian hnuah, hetiang zata power chhit man tihsan tumna awm hi a tha an ti lo tih sawiin, mipui harsatna sukiang zawnga hma la tur hian ngenna an thehlut ta tih a sawi bawk.

Mizo ngei dah turin ngen

Mizo Students’ Union (MSU) General Hqrs. chuan Higher & Technical Director atana Nazuk Kumar-i ruat a nih chungchangah nimin khan Deputy Chief Minister, Tawnluia chu hmuin he hna chelh tura Mizo ngei dah tura ngenna an thlen a. Higher & Technical Department Director post chu Mizo Mipui nawlpuiin an dawr thin leh zirlai ten tangkai taka kan hman thin thu sawiin, hetiang post pawimawh bik a Mizo Society hre lo leh Mizo tawng thiamlo an awm chuan a dawr thintu te tan  harsatna tam tak a awm thin thu a sawi bawk.

Crime Review Meeting nei

Nimin khan Lunglei District-ah Crime Review Meeting neiin kum kalta (2020) chhunga an District chhunga thubuai ziahluh awm leh a kaihhnawih thlirho a ni a, kum kalta chhung khan Lunglei District chhungah thubuai chi hrang hrang 132 ziahluh a nih thu leh thubuai 118-ah te chuan Chargesheet thehluh a nih thu tarlan niin Court-a thubuai chinfel tawh zat hi case 68 a nih thu leh Conviction rate hi 94.11% a ni tih tarlan a ni bawk.