Chanchin thar thenkhat :

Zophai Leilet sawihona nei

Nimin khan Kolasib District Bawrhsap, Dr. H. Lalthlangliana hovin Zophaia leilet enkawl chhunzawm dan tur relin thutkhawmna neih a ni a, he hunah hian Bawrhsap chuan Zophai-a ramri a kan ngaih hmun a leilet awmte kan enkawl chhunzawm dan tur chu kan ram hauhna kawnga thil pawimawh tak a ni tih sawiin, Zophai leilet enkawl chhunzawm dan tur chu ram leh hnam pum ang pawh a thil pawimawh tak a nih angin heng hmun a ram neitute chuan Sawrkar thuchhuak ngai pawimawh turin a chah bawk. Zophai hmun ah mi 46-in leilet nei ang a chhinchhiah a ni a, heng leilet neitute zawm tur hi Feb. 17, 2021 khan Kolasib District Magistrate chuan alo tichhuak tawh bawk a ni.

Dose 1,28,840 thleng tawh

COVID-19 vaccine ‘COVISHIELD’ chu tun thlengin dose 1,28,840 dawn a nih tawh tih nimin a Health Minister, Dr. R. Lalthangliana hova COVID-19 hri leng dinhmun thlirhona ah tarlan a ni a, heng zinga dose 55,780 hi mipui vantlang, kum 60 chunglam leh kum 45-59 inkar natna benvawn neite tan a thlawna sem tur niin vaccine mipuite dawn tur hi sawrkar laipuia thu-neitute hnenah dil belh tum mek a ni tih tarlan a ni. Mizoram chhung hmun 31 ah vaccine semna hmun siam niin, vaccine hi mi pakhat tan dose hnih zela lak tur a ni a, a lo thleng sa atang hian dose khatna la tawh te lak leh tur dahthat nghal a ni.

MSU in Pisa kai tur an dang

Mizo Students’ Union (MSU) General Hqrs. chuan Higher & Technical Education Department Director atana hnamdang a dah tawh sawn tura sawrkar an phutna in awmzia a neih loh avangin nimin atang khan Director Pisa kai tur hi an dang a, hun engemaw chhung chu Police lam nen pawh an innawr nghe nghe a ni. MSU chuan Mizoram sawrkar in H&TE Deopartment Director hi sawn a nih hma chuan Pisa kai lo tura a tih avangin nimin tlai dar 4:00 khan he an punkhawm hi an titawp tih an sawi bawk.

Minister 2 Demand pawm

Nimin-a Mizoram Legislative Assembly Budget Session neih chhunzawm-ah Minister pahnih, Deputy Chief Minister, Pu Tawnluia Department chan pathum, DP&AR, PHE leh UD&PA te tana sum ruahman, a vaiin Rs. 895,20,41,000/- leh Minister Lalchhandama Ralte chan Department 3, Printing and Stationary, School Education leh Skill Development and Entrepreunership atana sum ruahman, a vaiin Rs. 1576,40,32,000/- te chu sawihoa pawm a ni. Vawiin hian thutkhawm hi chhunzawm leh a ni dawn a, Minister pahnih Dr. R. Lalthanglina leh Lalruatkima-te Department enkawlna tur sum sawiho leh a ni ang.

ZPM MLA-a pawm ah ngai

ZPM Party Thalaite chuan MNF Party President, Zoramthanga thusawi chuan Lal-duhoma leh ZPM MLA dangte chu ZPM MLA dik tak an ni tih a pawm zia a nemnghet niin an sawi. Nimin-a thuchhuah an siamah ZPM Thalaite chuan March 2, 2021-a MNF-in Serchhip bial bye-election kick-off an neih ah MNF Party President, Zoramthanga chuan mimal inhuatna vànga MLA atanga inbàn theih anih lohzia a sawi rualin, “Mimal inhuatna vànga inbàn theih nise ZPM MLA zawng zawng bàn tir vek kan duh,” tiin a sawi tih an tarlang a. Hei hian Lalduhoma leh ZPM MLA dangte chu ZPM MLA dik tak an ni tih a pawm zia a nemngheh bakah, mimal inhuatna vàng liau liaua Lalduhoma hi bàn an nih zia a tarlang chiang hle bawk niin an tarlang a. Hei mai bakah hian Lalduhoma hektu MLA 12 te'n MNF Party President leh Chief Minister ni bawk, Zoramthanga'n an hekna a hriatpui loh thu an sawina chu an pu thlavang hauh duh avanga dawt sawi ah an ngaih thu leh chu chu he a thusawi hian a nemnghet lehzual niin an tarlang bawk.

Budget nuihza siamna ah ngai

Peoples' Conference (PC) Party Sr. Vice President Vanlalruata chuan Mizoram Budget thar tur chu nuihza siamna ni bera a ngaih thu a sawi. PC Party chuan nimin khan Mizoram Budget thar tur zirhona hun an buatsaih a, he hunah hian PC Party Sr. Vice President, Vanlalruata chuan Budget siam kawnga Mizoram sawrkar in ngaihtuahna tak tak a hmang lo nia sawiin, Assembly House-a chai mek Budget chu a dik theihloh dan te a sawifiah a. Kum 2020-21 a sawr-kara hnathawk mi 54,175 awm chu kum 2021-22 ah mi 1,605 laia punga mi 55,780 an nih tawh dawn laia, heng mite hlawh tur hian kum 2020-21-a cheng vbc. 4,672.98 an dah laia 2021-22-a cheng vbc. 185.58 laia tlem zawk hlawh tura cheng vbc. 4,487.40 chauh an dah thu a sawi bawk.