Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

Serchhip District-ah ‘Khelo India-Sports for Peace and Development’ khelh tan a ni

Nimin atang khan ‘Khelo India-Sports for Peace and Development’ chu Serchhip District-ah neih tan niin District Bawrhsap, Kumar Abhishek chuan a hawng a ni.

Serchhip District Level Khelo India Committee buatsaih ‘Khelo India-Sports for Peace and Development’ hawnna hi nimin tlai dar 4:00 khan Serchhip Boxing Hall-ah neih niin he huna khuallian Serchhip District Bawrhsap, Kumar Abhishek chuan Khelo India chuan India ram thalai te thiamna leh theihna zawnchhuah leh haichhuah zel chu a tum a nih thu sawiin, chung mite chu National Level-ah chhawpchhuah an nih dawn thu a sawi a. Sport Discipline hrang hrangah Mizo ten thiamna leh theihna kan neih thu sawiin, remna leh muanna boruak nuam tak hnuaiah zelen taka Infiamna kalpui chhoh zel a ni chu lawmawm a tih thu a sawi a. Khelo India Programme a taka kalpui a ni chu lawmawm a tih thu sawiin, tangkai taka hmang tura infiammi te duhsakna hlan chungin a hawng a ni.

Nimin tlai a ‘Khelo India-Sports for Peace and Development’ hawnna hun hi Serchhip District Sports Committee Chairman, K. Tlangthanmawia chuan kaihruaiin Serchhip District Level Khelo India Committee-a Member Secretary, Vanlalhruaia chuan he inelna buatsaih a nih chhan leh an kalpui dan te a sawi a. Kumin hian ‘Khelo India-Sports for Peace and Development’ hnuaiah hian Sports discipline 8-ah inelna neih tur a sawi a. Inelna neihna tur atan hian Football, Volleyball, Basketball, Badminton, Table Tennis, Boxing, Wrestling leh Taekwondo te thlan niin Football, Volleyball, Badminton leh Boxing-ah hian Block Level-ah inelna neiin hemi hnu hian District Level-a inelna neih leh tur a ni dawn a, Wrestling, Basketball, Teakwondo leh Table Tennis-ah te chuan District Level-a inelna hi neih nghal a ni dawn thung a, Sports Discipline tin ten anmahni remchan ang theuha inelna hi buatsaihin tun thla ni 19-ah chuan zofel hman vek tura ruahman a ni.

‘Khelo India-Sports for Peace and Development’ hawnna hunah hian Serchhip District Boxing Association buatsaihin Boxer te inhnek en a nih bakah Serchhip District Amateur Taekwondo Association buatsaihin Takewondo thiam ten Special Item an entir a, Serchhip District Wrestling Association atangin Wrestling hmuhnawm tak en a ni bawk.

Comments

Chhiar Hlawhte