Serchhip DC in Model Anganwadi Centre tur a hawng

Serchhip District Bawrhsap, Kumar Abhishek chuan nimin khan Serchhip ICDS Project hnuaia Anganwadi Centre No. 8, Thenzawl Dinthar Veng chu Model Anganwadi Centre ni turin a hawng.

Mizoram-a a hmasa ber leh awmchhun Model Anganwadi Centre, Serchhip ICDS Project Anganwadi Centre No. 8, Thenzawl Dinthar Venga mi hi District Bawrhsap chuan hawngin, Thenzawl SDO (Civil) hmalaknaa Mizoram a hmasa ber leh awmchhun atan naupang tana tangkai, an zirna pui thei tur hawia Model Anganwadi Centre siam a ni chu lawmawm a tih thu leh, hetiang hmalakna chu midang tan pawh entawn tlak a tih thu a sawi a ni.

Model Anganwadi Centre hi naupangte zirna pui thei tura cheibawl niin Thenzawl West VC leh MGNREGS bakah Company ten vantlang rawngbawl hna an thawhna, CSR Fund hnuaia sum hmuh leh SDO (Civil) Office atanga sum awm ang hmanga hmalakna a ni a, he hmalakna hnuaiah hian Anganwadi Centre hi chei niin, Building bangah naupang te pui thei tur lemziak chi hrang hrang dah a niin, he hmalakna hi ‘Building as Learning Aid’ tia sawi a ni a. Naupang ten nuamti tak leh hlim taka Anganwadi an kal theihna tur leh an thil hmuh atanga zirna lama hmasawnna an neih theihna tur atana ruahman niin hetiang ana Anganwadi Centre 50 dang cheibawl leh tur hian rawtna thlen a ni tawh bawk.

He hunah hian hmalakna bultumtu Thenzawl SDO (Civil), Kulothungan A, IAS bakah Serchhip ICDS Project-a CDPO leh Thenzawl West VCP te pawhin thu an sawi bawk a ni.