Latest News

‘Insak tanpuina kan pe dawn che u’ tiin mipui bum tum mek party an awm - Lalduhoma

ZPM Leader, Lalduhoma chuan Serchhip bial-a Assembly bye-election lo awm turah Pathian leh Kohhran mitmei veng chunga dik taka campaign turin ZPM mi leh sa te a chah a, Housing For All (HFA) hnuaia In sak tanpuina hmanga mipui bum tum mek Party an awm niin a sawi bawk.

Inrinni khan Serchhip Block ZPM huamchhunga ZPM Unit, Zonu leh Thalai Unit hruaitute tan New Serchhip YMA Hall-ah Political Training neih niin he hunah hian ZPM Leader, Lalduhoma chuan he thu hi a sawi a, ZPM Leader chuan, “ZPM chu kalphung hrang nei kan ni a, kan danglam bik tur a ni. Mite pawh kan lakah an thikthu a chhe bik em em a, party dang ten an tih mipuiin an nuih liampui mai mai ang chi hi keini lakah chuan an nuih liampui ve thei lo, heng te hi huat tur a ni lova, an lakah beiseina sang tak an neih vang zawk a ni tih kan hriat a tul a, kan mimal nun pawh kan uluk a ngai zual bik a ni,” a ti a. Inthlan lo awm leh tur, kum 2023-ah chuan mipui beisei ber kan ni a, Pathian zarah kan sawrkar ngei turah kan ngai. Mizo mipuite vote thlak dan kalphung en chuan, rorellai kan nin tawh chuan a thlak nan inthlan hmasaa pahnihna, tling teuh ber te inthlan leh hunah kan ti tling zel mai thin a ni,” a ti bawk.

Serchhip bial inthlan tur denchhena party thenkhat Campaign-na Housing For All (HFA) chungchang sawiin Lalduhoma chuan, “Insak tanpuina kan pe dawn che u, tiin mipui bum tum mek party an awm a. Kum 2022-a tawp tur PMAY-HFA (U) hi State sawrkarin an duh duh a an tih sak a tihsak loh theih a ni lo, Central Scheme a ni a, a duh apiang tan dan anga dil theih a ni. Campaign nana hman chi a ni lo,” a ti.

Lalduhoma chuan he Scheme chauh lo pawh hi Central Scheme tam tak a awm tih sawiin, “Kan State sawrkar hi a rethei lutuk a, sawrkar hnathawkte hlawh leh pension te a bat sak mek lai leh, kan leiba a pun thur thur lai hian Insak tanpuina leh thildang reng reng pawh khawi atang mahin State sawrkar hnuai atanga pek theih leh tihsak theih ngaihna a awm lo. Tuna sawrkar hmalakna tur reng reng leh an lungphum zawng zawng pawh hi Central Scheme hnuai atanga sum lokal tura beisei vek a ni,” a ti bawk. 

Comments

Chhiar Hlawhte