Latest News

FSSI Chairperson in CM leh Health Minister kawm

Food Safety and Standards Authority of India (FSSAI) Chairperson Rita Teaotia leh a thawhpui te chuan nimin khan Chief Minister, Zoramthanga kawmin Mizoram mipuiin ei tur thianghlim leh hrisel zawk an neih theihna tura hmalak ho dan tur an sawiho.

Ministry of Health & Family Wefare hnuaia Food Safety and Standards Authority of India (FSSAI) Chairperson Rita Teaotia leh CEO Arun Singhal bakah thawktu dangte hian nimin khan Chief Minister, Zoramthanga hi a Pisa-ah kawmin Mizoram chhungah chak zawka hna an thawh theihna tura hmalak ngai te Chief Minister hnenah an thlen a. FSSAI chuan ei leh in thianghlim mai bakah ei tur dik, taksa hriselna mipuiin an ei theih a, natna hrang hrang laka him tlan theihna tura Eat Right India initiative an kalpui mek chungchang te an sawipui bawk.

He hunah hian Chief Minister chuan mipuiin eitur thianghlim an neih a, hriselna atana thalo ei leh in, zuk leh hmuam do a ngaihpawimawh thu a sawi a. FSSAI nen inngheng hnai zawka an thawhdun a, State mipui hriselna atana an theihtawp an chhuah pawimawh a tih thu a sawi a. State chhunga eitur tharchhuah leh siamchhuah bakah State pawn leh ram pawn atanga chawkluh te chu a him tawk em tih chik zawka enfiah a tul thu a sawi bawk.

FSSAI hotu Chairperson Rita Teaotia leh Arun Singhal, Chief Executive Officer-te hian nimin vek khan Health Minister, Dr. R. Lalthangliana chu a Office-ah kawmin Mizoram-a Food Safety tihhmasawnna tur kawng hrang hrang leh Food Testing Laboratory changtlung zawk neih a nih theih dan tur kawngte an sawipui a. Health Minister chuan FSSAI hotu sang te hi lo lawmin, an thahnemngaihna fakawm a tih thu a sawi a. An thahnemngaihna chuan rah tha tak a chhuah ngei ang tih a beisei thu leh, nasa zawka tan la a, ei leh in thianghlimna kawnga FSSAI hmalakna theihtawpa thlawpa tan lak zel a nih tur thu a lo hrilh a ni.

FSSAI hian India ram pumah ei leh in thianghlimna kawnga hmasawnna turin nasa takin beihpui a thlak mek a. State/UT tan tanpuina pawisa leh Food Testing Equipments te an pe a, Food Testing Laboratory tam zawk leh changtlung zawk dinna turin hma a la nasa em em a ni. A bikin Infrastructure nei thalo State-te dawmkanna kawngah hma a la nasa zual a. Mizoram Food Safety Eco-System tihchangtlunna tur pawhin FSSAI leh Mizoram sawrkar indawrna a kal mek a. Chumi atan chuan MoU siam mek a ni a, a hlawhtlin hunah chuan Mizoram Food Safety pawhin hmasawnna nasa tak a nei ngei dawn a ni.

FSSAI hotute hian State sawrkar hotu dangte pawh Food Safety chungchangah an kawm bawk a ni.

Comments

Chhiar Hlawhte