Hna chan rawn haw 2637 awm

Mizo thalai State pawn-a hnathawk COVID-19 hri leng vanga an hna chan Mizoram-a lo haw Sawrkar-a inhriattir mi 2,637 an awm a, heng mite tan hian an eizawnna pui thei tur Training pek mek a ni.

Nimin-a Assembly Session-ah Aizawl South-III bialtu MLA, Dr. F. Lalnunmawia zawhna Labour, Employment, Skill Development and Entrepreneurship Minister, Lalchhan-dama Ralte-in a chhannaah he thu hi tarlan a ni a. Minister chuan, Sawrkar chhinchhiah danin COVID-19 hri leng vanga State pawn atanga lo haw zawng zawng hi an vaiin mi 23,705 an ni tih a sawi a, an zinga thenkhat chu zirlai te, chhungkua-a awmte an nih tih sawiin, MYC-in a buaipuite chu hnathawka awm, hri leng vang an hnathawh lai chante an ni a, chung mite chu MYC ah inhriattir tura tih an ni a, chumi ang chuan an hnena inhriattir hi mi 2,637 an awm tih a sawi. 

Lalchhandama Ralte chuan, heng hna chante chhawmdawl tur hian theih ang anga hmalak a ni tih a sawi a NEC-ah sum dil niin, a tumkhatnaah cheng vbc. 3 hmuh a ni a, chumi hmang chuan mi 720 hnenah an eizawnna pui thei tur Training hrang hrang pek a ni a. A tum hnihna ah NEC atang bawkin cheng vbc. 2.7 hmuh leh niin, hemi hmang hian mi 800 vel hnenah Training hi pek leh mek a ni tih a sawi.

LESDE Minister chuan COVID-19 hri leng vanga mipui harsatna sutkian kawngah LES-DE Department chuan theihtawp a chhuah tih sawiin, Board Meeting-in a rel angin Labour Cess tlingkhawm atangin mi 50,000 hnenah Rs. 3000/- theuh an Account-ah thun sak a ni a, chuta sum sen chu a vaiin Rs. 15,88,41,000/- a tling a, hemi bakah hian mipuite ei leh bara harsatna sukiang tur leh thla khat chhung Ration buhfai a thlawna an dawn theih nan Supply Department hnenah cheng nuai 640 chuang pek a ni tih a sawi bawk.